KUCHING: Kamek Empun Production udah ngatur penemuai basa ngagai Sapit Menteri ba Opis Premier Sarawak (Pekara Korporat, Pemadah & UKAS) Datuk Abdullah Saidol ba opis iya di Kunsil Nengeri (DUN) Sarawak ditu, Hari Satu.

Penemuai nya betuai ke Direktor Pengatur Kamek Empun Production Jalot Jeman dikena ngelakuka filem baru ari sida, iya nya Tumbukan Emas: Sapok Biki.

Ku Jalot ke mega Direktor Filem Tumbukan Emas: Sapok Biki, filem nya disadang dipandang kena 23 Julai 2025, bepanggai ba timpuh ditetap Opis Menteri Dagang Temuai, Industri Kreatif enggau Seni Pemerindang Sarawak (MTCP), sebedau dipandang ba panggung wayang selampur menua kena September 2025.

Maya nya, Datuk Abdullah mega madah ke UKAS nadai penanggul nyaup ngelakuka filem nya, lebih agi 'teaser'.

Ku iya nerang, sukung tu mega ditegap enggau kaul sereta belanja ti udah diberi MTCP ngagai kompeni nya.

"Filem ti ngayanka cherita atlit tebilang Sarawak, Sapok Biki nya patut diperati sereta disukung ukai semina mandangka anak Sarawak, tang mega bisi pengulih nyadi produk dagang temuai enggau daya idup nengeri," ku iya.

Sama datai ba penemuai basa nya, Direktor UKAS, Awang Putrayusrie Awang Redzuan. -EDISI UKAS