KUCHING: Skim Pelajar Tinggi Enda Bebayar Sarawak (FTES) di Sarawak dipelaba deka ngena belanja urung RM300 juta setaun.

Menteri Pelajar, Inovasyen enggau Pemansnag Penau, Dato Sri Roland Sagah Wee Inn madah, penyampau nya dikira nitihka penyampau nembiak ti patut nerima bantu, iya nya bisi 60,000 ari mayuh insitusyen pelajar tinggi enggi nengeri tu.

Taja pia, ku iya nerang, ungkus ke dibelanja engka bisi ubah ninting taun bepanggai enggau kus sereta penyampau nembiak ke patut nerima.

“Penyampau belanja bepanggai enggau bayar sekula enggau universiti, taja pia kami udah ngaga langgur.

“Semua tu bepelasarka penyampau dipelaba nitih ke taun tu, lalu dipelaba manggai urung RM300 juta setaun. Ungkus nya engka enda sama ninting taun laban ba taun keterubah digaga, penyampau dipelaba urung RM300 juta.

“Udah tentu, ba taun ke dudi, penyampau nembiak ti patut nerima deka nambah, lalu ungkus deka berubah,” ku iya maya nyimpul jaku opis menteri iya ba Aum Kunsil Nengeri (DUN) Sarawak Ke-19, Hari Satu.

Kelimpah pelajar enda bebayar, Dato Sri Roland madah, 9,000 nembiak udah nerima komputer enggau ungkus urung RM3,000 siti lalu bekenaka belanja RM27 juta ngatur inisiatif nya.

Kelimpah ari nya, ba bauchar bup, bisi 3,000 nembiak udah nerima bantu sepenyampau RM500 siku, ti ngena belanja RM1.5 juta. -EDISI UKAS