KUCHING: Perintah Sarawak majak mandangka pengeransing nyungkak sistem pelajar menua tu nengah pengawa ngemendarka macham projek ngaga enggau ngadu sekula di menua pesisir nengah Langgur Pemansang Malaysia Lumpar Ke-12 (RMK-12) enggau RMK-13.
Menteri Pelajar, Inovasyen enggau Pemansang Penau Sarawak, Dato’ Sri Roland Sagah Wee Inn madah, projek nya nyengkaum ba Daro, Tellian, Jepak, Bukit Semuja, Krian, Opar, Ngemah, Balingian, Ba’kelalan, Bukit Begunan, Meradong enggau Tanjong Datu.
Ku iya, di Daro sekeda ari projek ke dikemendar digaga nyengkaum projek ungkup Nembiak Beguna Pelajar Khas (MBPK) di Sekula Sekondari (SMK) Toh Puan Datuk Patinggi Hajah Normah nengah RMK-12, Rolling Plan Keempat (RP4).
Kelimpah ari nya, iya madah, pengawa ngaga baru Sekula Primari (SK) Batang Lassa bela dikemendar nengah RMK-12, Rolling Plan Kelima (RP5).
"Opis Pelajar Nengeri Sarawak (JPNS) diatu ba renggat merambu deka numbuhka sebuah palan khas ungkup nembiak Pom Enam ke deka dikenataika ba Langgur Pemansang Malaysia nangkan tu sepengudah skop projek, taba enggau guna diputus,” ku iya.
Iya madah munyi nya maya nyimpul jaku opis menteri iya ba Aum Kunsil Nengeri (DUN) Sarawak Ke-19, ditu, Hari Satu.
Nambah ke jaku iya, Dato Sri Roland madah, di sitak Tellian, perintah udah ngemendar pengawa ngaga sereta nyeleti SK Mukah enggau SMK Mukah ari nengah RMK-12.
"Kelimpah ari nya, SK Dua Sungai enggau SK Kampung Petanak mega deka diseruri lalu projek tu disadang tembu sereta diserah ngagai JPNS kena Jun 2025," ku iya.
Enda tinggal mega, SK Sungai Setulan di Jepak bulih pemendar nengah langgur pemansang nya.
Dato’ Sri Roland madah, ba RMK-13, pengawa ngaga SMK Serian No. 2 enggau SK Sri Sadong di Bukit Semuja udah dikenataika, kelimpah pengawa nyeleti SK Kabo Ulu di Krian sereta pengawa ngaga SK Selampit di Lundu.
Ku iya, tu nyengkaum SK Sungai Badengan di Balingian ke diatu benung digaga lalu disadang tembu suku keempat 2026.
"Perintah Sarawak bisi inisiatif mindahka sekula ke napi penanggul ampuh bah di Ngemah lalu ngelanggur taba lama SMK Datuk Haji Abdul Rahman Yakub (SEDAYA) digagaka nyadi palan latih,” ku iya madah baru.
Berebak enggau nya, iya mega madah, ba Ba’kelalan, proses ngambi tanah ungkup projek SK Long Sukang enggau SMK Long Semadoh diatu benung diatur kelimpah pengawa ngererak SK Tanjong Bijat, Bukit Begunan deka berengkah sepengudah diperesa JPNS. -EDISI UKAS
