KUCHING: Perintah Sarawak benung ngelanggur transformasyen Kot Anak Nengeri ngambika bela tikas baka Kot Sivil enggau Syariah.

Menteri ba Opis Premier Sarawak, Dato Sri John Sikie Tayai madah, taja pia, pengawa nya tejanggal ketegal agi nganti dua Rang Undang-Undang dikemendarka.

"Kaunsil Aum Perintah Nengeri (MMKN) udah ngaga pemutus sereta ngemendarka Pelin Besai Transformasyen Kot Anak Nengeri kena bulan Julai 2023.

"Batang tuju transformasyen tu dikena kitai nyerenih baru struktur Kot Anak Nengeri ke diatu lalu ngangkatka status nyadi institusyen akim baka Kot Sivil enggau Kot Syariah," ku iya madah.

Iya madah munyi nya maya nyimpul jaku ari opis menteri iya ba Aum Kunsil Nengeri (DUN) Ke-19, Hari Satu.

Iya mega madah, pekara nya deka bisi tiga tikas pengawa berengkah ari ngubah undang-undang negeri.

"Undang-Undang Nengeri ke baru ti dilanggur dikena nyerenih baru iya nya RUU Kot Anak Nengeri ke baru dikena nganti Ordinan Kot Anak Nengeri 1992 enggau Undang-Undang Kot Anak Nengeri 1993 sereta RUU Kaunsil Nyiri Akim Kot Anak Nengeri enggau Skim Servis sereta Upah Akim Kot Anak Nengeri bekaul pengawa nyiri enggau skim servis ba Akim Kot Anak Nengeri," ku iya nerang.

Ku iya, dua iti langkar RUU nya agi benung diperesa Opis Luyar Besai Nengeri. -EDISI UKAS