KUCHING: Perintah Sarawak deka berati baru peminta nikika gaji Tuai Raban Bansa enggau Genturung Pendiau (KMKK) ketegal ngira pengawa sida ke majak nambah.

Menteri ba Opis Premier Sarawak, Dato Sri John Sikie Tayai madah, pekara tu patut diperunding laban kepenudi gaji KMKK diadu ba taun 2018 suba ke ditikika RM100.

Nya alai ku iya, pekara nya deka dirandau ba Aum Komiti Khas Ngatur Pekara KMKK ba suku ketiga taun tu.

"Tu dikena nentuka penyampau ke dipinta engkeman enggau tanggungpengawa dikereja sida," ku iya.

Iya madah munyi nya maya nyimpul jaku ari opis menteri iya ba Aum Kunsil Nengeri (DUN) Ke-19, Hari Satu.

Ba pekara bukai, iya madah, Perintah Sarawak semampai beratika pematut nambah penuduk nyadi KMKKK ngambika servis perintah ulih dikenatai ngagai rayat enggau manah.

Ku iya, naka ke diatu, Perintah Sarawak udah nerima 923 peminta nyadi KMKK baru.

"Semua peminta tu udah diperati bepelasarka pematut baka nitih pemesai menua, pemayuh rayat enggau penyampau rumah baru di menua nya.

"Semua peminta tu bela deka dipejurai ba aum Komiti Khas Pekara Tuai Raban Bansa enggau Genturung Pendiau ba suku ketiga 2025," ku iya madah baru. -EDISI UKAS