KUCHING: Bisi 27,033 nembiak Sarawak ke nampung pelajar ba palan pelajar tinggi di selampur menua udah ngenataika peminta Bantu Pekara Wang Khas (BKK) naka 24 Mei tu.

Ku Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, BKK meri elaun sepenyampau RM1,200 setaun ngagai tiap iku nembiak Sarawak, enda ngira penatai pemisi ruang bilik.

Nambah ke jaku iya, iya madah, tuju bantu nya dikena ngelempung ke tating belanja nembiak ngambi ke sida meri perati lebih agi ngagai pelajar.

“Kami melaba semua nembiak ke patut nerima Bantu Pekara Wang Khas (BKK) bisi 60,220 iku.

“Nyentuk 24 Mei 2025, bisi 27,033 nembiak udah ngenataika peminta sida, nya alai aku deka madah ngagai semua nembiak ti patut nerima BKK, timpuh abis peminta nya kena 1 Jun 2025,” ku iya.

Iya madah munyi maya nyimpul jaku opis menteri iya ba Aum Kunsil Nengeri (DUN) Sarawak Ke-19, Hari Satu.

Taja pia, ku iya, inisiatif tu ukai semina ngembuan tuju dikena ngelempungka tating belanja ninting hari tang deka meda nembiak ngemeratka pelajar sida. -EDISI UKAS