KUCHING: Palan Sains Sarawak diatu udah digaga naka 65 peratus lalu disadang ulih tembu ujung taun tu.

Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn madah, palan nya bela diperambu berengkah ulih dibuka suku keterubah taun 2026.

"Tu siti agi kelai pengeransing nengeri tu nyungkakka pelajar Sains, Teknologi, Injiniring enggau Matematik (STEM).

"Kelimpah ari nya, sebagi ari inisiatif nengah Palan Sains Sarawak tu mega nyengkaum siti hab satelit ke diatu benung digaga ba Loji Perintis Biovalley Sarawak di Miri ti bisi Makmal Sains Umum keterubah iya di nengeri tu," ku iya maya nyimpul jaku ari opis menteri iya ba Aum Kunsil Nengeri (DUN) Sarawak Ke-19 ditu, Hari Satu.

Iya mega madah, makmal nya ila deka nyadi pelasar pelajar betikas tinggi lebih agi dikena bejalaika eksperimen Sains ke enda ulih digaga di sekula.

"Ari tu kitai meda pengeransing Perintah Sarawak ngerandang awak ke besai agi mujur ba pelajar Sains betikas tinggi nyerumba tuju penumbuh Pelin Pemansang Udah COVID-19 (PCDS) 2030 enggau pelin transformasyen pelajar nengeri," ku iya madah baru.

Dato Sri Roland bela madah ke Palan Sains Sarawak deka nyaup ngemujur penemu inovasyen enggau pengawa mansik ba raban nembiak seraya ngenegap ekosistem pelajar STEM di Sarawak.-EDISI UKAS