KUCHING: Perintah Sarawak ngungkupka pelajar enda bebayar dipunka ba nembiak Sarawak ti belajar ba Palan Pelajar Tinggi (IPT) enggi Perintah Sarawak ba pelajar Sains, Teknologi, Injiring enggau Matematik (STEM).

Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn madah, inisiatif nya mega nyengkaum bidang Undang-Undang, Pengawa Berubat, Akaun, Pekara Wang enggau Psikologi ti ngira napi pengawa ke diguna Perintah Sarawak maya tu.

“Tu semina dikena ngepun ke inisiatif lalu kitai mega patut ingat lebih agi ngena belanja ke bisi enggau patut.

“Kitai meseti nemu opis menteri enda semina meri perati ngagai pelajar aja tang mega ngagai inovasyen enggau pemansang penau mega.

"Nya alai kami meseti ngira pengelandik ke patut, setipak enggau guna perintah ba taun ti deka datai,” ku iya maya nyimpul jaku ari opis menteri iya ba Aum Kunsil Nengeri (DUN) Sarawak Ke-19, Hari Satu.

Maya nya, iya nimbal tanya ti dikenataika Kaban Kunsil Nengeri (ADUN) Padungan, Chong Chieng Jen ke ngelalau perintah meri inisiatif nya ngagai semua kus ba IPT enggi Perintah Sarawak.

Nambah ke jaku iya, iya madah, dudi hari ukai semina kus enda bebayar ba bidang STEM aja tang macham agi inisiatif bukai dikena meransang nembiak Sarawak nampung belajar ngagai tikas tinggi.

Berebak enggau nya, iya ke mega ADUN Tarat madah, Perintah Sarawak udah ngemendar Skim Pelajar Tinggi Enda Bebayar Sarawak (FTES) ti deka berengkah ba taun 2026 ke diungkup ngagai anak peranak Sarawak aja.

Ku iya nerang, Skim FTES keterubah deka meri ngemeratka program degree ba bidang STEM, Undang-Undang, Pengawa Berubat, Akaun, Pekara Wang enggau Psikologi.

Kelimpah ari nya, skim tu mega meri elaun ninting taun sepenyampau RM15,000 ngagai nembiak ari ruang bilik ke ngembuan penatai pemisi enda lebih agi per kapita RM1,500 sebulan, dikena nyaup ungkus belanja pengidup sepemanjai timpuh belajar.

“Perintah mega meri jamin nadai nembiak enda dikeibuh laban Yayasan Sarawak bela nyendiaka bantu pekara wang baka bantu pelajar tauka jalai ungkup kus bukai," pia ku iya. -EDISI UKAS