LUBOK ANTU: Perintah Sarawak ngepunka singkang nungkap atur undang-undang bekaul teda sawit di kandang menua tu ungkup tuju aktiviti hiliran ari teda nya.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, iya udah ngasuh Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom ngambi berandau enggau Luyar Besai Sarawak, Dato Sri Saferi Ali ungkup tuju nya.

“Dato Sri Dr Stephen Rundi deka berandau enggau Luyar Besai Sarawak pasal ubah ngagai undang-undang kitai ngambi kitai ulih ngadu teda tu (sawit) ti ulih nyadi penatai pemisi baru ungkup Sarawak.

“Ari teda tu, kitai ulih ngasilka kuasa gadung,” ku iya.

Iya madah munyi nya ba aum pemberita pengudah bejadika Kilang Nginjin Sawit (KCP), ditu kena Hari Enam.

Terang iya, inisiatif tu negapka tanggungpengawa Sarawak ba ekonomi ngena baru nyadi siti ari pun penatai pemisi besai kandang menua tu.

Ngenang silik, Datuk Patinggi Abang Zohari madah ke Sarawak bisi 85 kilang nginjin minyak sawit naka diatu ke alai teda nya deka digumpul nengah siti palan nginjin dikena ngasilka bahan api bio.

“Kitai bisi 85 kilang nginjin minyak sawit lalu sida ulih bekerejasama ke alai teda ti udah dibuai sida, kitai ngiga baru lalu ngumpul nya nengah siti palan sebedau diinjin.

“Tu deka mansutka asil besai baka bahan api bio ti dikena ngaga minyak bilun meruan (SAF).

“Enti sema tu ulih dikemujur, Sarawak ulih nyadi palan pemansut SAF seraya nambahka agi penatai pemisi kitai,” terang iya.

Sama datai, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom; Sapit Menteri Industri Pemakai, Komoditi enggau Pemansang Kandang Menua Sarawak, Datuk Martin Ben; Sapit Menteri Dagang Antarabansa, Industri enggau Meranak Puku Sarawak, Datuk Dr Malcolm Mussen Lamoh; Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis; Kaban Parlimen Lubok Antu, Roy Angau Gingkoi; Kaban Parlimen Batang Lupar, Mohamad Shafizan Kepli sereta temuai dipebasa bukai. – EDISI UKAS