LIMBANG: Agensi perintah dipinta naka ulih ngerembai inisiatif bantu perintah baka Pengerami Sejambak Kasih nentuka bantu datai ngagai rayat ti dituju kelebih agi maya musin pengerami.
Sapit Menteri Pengangkut, Datuk Hasbi Habibollah madah, inisiatif tu beguna nentuka raban bekaul enda dikelaung ari nerima bantu ketegal kurang penerang ba renggat baruh.
“Kitai enggai sida ti patut nerima bantu perintah kena tinggal tauka enda nemu pasal nya, ila perintah deka disalah tauka dituduh enda mantu rayat taja pen kebendar bantu nya udah bisi, semina bantu enda datai ngagai rayat kelebih agi ba sitak menua pesisir,” ku iya.
Iya madah munyi nya ba Pengerami Sejambak Kasih Gawai diatur Opis Pengelantang Komuniti Sarawak Bagi Menua Limbang ti diatur di Dewan Kampung Bunga Raya, Hari Lima tu tadi.
Ku iya, agensi perintah baka Opis Pengelantang, Opis Residen enggau Opis Pelilih meseti bebendar ngenataika penerang bantu terus ngagai rayat kelebih agi ba menua ulu.
“Aku ngarapka inisiatif bantu perintah tu datai ngagai rayat enggau agensi ti bekaul baka Opis Pengelantang, Opis Residen enggau Opis Pelilih Limbang meseti ngerembai enggau nesau pekara tu ngagai renggat baruh,” ku iya.
Iya mega minta staf agensi ukai semina nganti ba opis tang semampai meri penerang enggau ngaul rayat.
Pengerami Sejambak Kasih nya entara inisiatif perintah nengah Opis Menteri Pemansang Indu, Ruang Bilik enggau Komuniti sereta Opis Pengelantang Komuniti ngaul raban tusah kelebih agi maya pengerami baka Gawai Dayak.
Kaban Parlimen Limbang nya madah, pengerami Gawai Dayak ukai semina nunjukka pemujur musin ngetau tang mega nyadi medium besai mekuh penyerakup enggau kaul entara rayat pupu bansa di Sarawak.
“Sarawak tu siti nengeri ti diuan pupu bansa, jalai pengarap enggau bemacham penatai tang semua kitai ulih idup lantang enggau likun.
“Pengelantang enggau penyerakup tu beguna amat dikena nampung perambu pemansang enggau ngeranchak ekonomi Sarawak baka ti diperambu tuai kitai,” ku iya.
Inisiatif baka Pengerami Sejambak Kasih nyadi bukti penyiru perintah nentuka pengelantang rayat semampai dikenulu kelebih agi maya pengerami besai ungkup komuniti lokal. – EDISI UKAS
