KUCHING: Perintah Sarawak benung berati ke perambu nambah agih belanja dikena meli kereban digital baka iPad enggau laptop ngagai bala nembiak berindik ari peminta ti majak nambah.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, tu nitih ke timbal ti diterima pengudah peminta bantu meli bup nyau kurang dibanding peminta meli kereban digital.

“Kami udah bejalaika tungkal lalu tetemuka nembiak diatu suah agi download bup ke dalam iPad ngambi macha bahan malin terus ari kereban nya seraya peminta bup fizikal nyau majak kurang.

“Nya kebuah, aku madah ngagai Datuk Annuar Rapaee (Sapit Menteri Pelajar, Inovasyen enggau Pemansang Penau Sarawak) ngambi nambah agih belanja ungkup iPad tang nyau ngurang ke bajet ungkup baucher bup.

"Insya-Allah, pekara tu deka diperunding dalam bajet ke deka datai,” ku iya bejaku ba Pengerami Anugerah Bup Pemadu Manah Premier Sarawak ba siti hotel tebilang ditu, kena Hari Lima.

Ungkup penerang, Perintah Sarawak udah bejalaika inisiatif 'Sarawak Free Laptop Assistance' enggau 'Sarawak Book Voucher Assistance' dikena mantu nembiak B40 di palan pelajar tinggi.

Datuk Patinggi Abang Zohari madah, inisiatif tu seraris enggau juluk Perintah Sarawak nyendiaka pelajar tinggi pechuma dudi hari.

Ku iya, kereban digital tu deka nyadi siti ari kereban ti diberi ngagai nembiak dikena nambah penemu nengah digital.

Sama datai, Sekretari Perintah Sarawak, Datuk Amar Mohamad Abu Bakar Marzuki; Sapit Menteri Pelajar, Inovasyen enggau Pemansang Penau Sarawak, Datuk Dr Annuar Rapaee; Sapit Menteri Di Opis Premier Sarawak (Integriti enggau Ombudsman), Datuk Dr Juanda Jaya; Kaban Kunsil Nengeri (ADUN) Daro, Safiee Ahmad; tuai opis sereta temuai dipebasa bukai. – EDISI UKAS