KUCHING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg meransang bala pengarang enggau pemansik ngasilka karya bepelasarka sejarah Sarawak ari sukut komuniti empu.

Iya mega merambu dua pejuluk ti ulih nyadi bahan dikarang iya nya kisah bukit Sadok enggau Rentap sereta sejarah Lidah Tanah enggau Siniawan ti suba nyadi palan pemerintah besai di Sarawak.

“Siti ari pejuluk ti ulih diangkat iya nya kisah Bukit Sadok enggau peranan Rentap.

“Nyema ulih, tungkap patut dipejalai ari sukut perspektif kita empu, bepelasarka sejarah kitai.

“Kebuah pia laban bisi kaul entara kisah nya enggau isu lanun (piracy) lalu meseti diperati sekali ke amat bisi kaul entara Rentap enggau piracy.

“Nya kebuah, siti tungkap penuh meseti dipejalai lalu engka pejuluk ti engkeman ungkup tungkap tu iya nya "Bukit Sadok Rentap" lalu ari nya kitai ulih ngadu dokumentasyen sejarah nya lenak agi,” ku iya.

Iya madah munyi nya maya bejaku ba Pengerami Anugerah Bup Pemadu Manah Premier Sarawak di siti hotel tebilang, ditu kena Hari Lima.

Perambu kedua ngenang pasal sitak Lidah Tanah enggau Siniawan ti ku iya kala nyadi 'seat of power' sebedau jeman pemerintah Rajah James Brooke.

"Ti kedua, 'Merpati Jepang Datuk Patinggi Ali: Seat Of Power Di Sarawak' laban Sarawak lebuh nya ukai baka diatu ke alai sitak nya mungkur ari Lidah Tanah nyentuk Siniawan tang 'seat of power' di Lidah Tanah.

“Mayuh nilai sejarah sebedau pemerintah James Brooke enggau maya nya mega di Lidah Tanah enggau Siniawan," ku iya.

Iya madah ke sejarah ba sitak nya kebuah iya setuju ngaga jalai alun empat arung ke Bau mansa Siniawan nentuka temuai kin lalu meda taba ti kala nyadi di Lidah Tanah enggau Siniawan.

Ku iya baru, sejarah tu bisi kaul enggau genturung Melayu ke bisi ba Siniawan ke alai din bisi penyerakup rat entara orang Melayu enggau komuniti Bidayuh ba sitak nya.

“Nya kebuah, kita tau ngarang bup nya ari sukut sejarah kitai lalu nengah bahan ti bisi nya kitai ulih nyelak ngambi meransang komuniti ngarang enggau fakta,” terang iya.

Berebak enggau nya, iya ngemendar niki ke perais mata duit ungkup Anugerah Bup Pemadu Manah Premier Sarawak kategori Dichelak Luar ari RM5,000 ngagai RM10,000 seraya kategori Dichelak Dewan Bahasa Dan Pustaka (DBP) ari RM8,000 ngagai RM15,000.

Ku iya, tu dikena meransang pengawa nyelak mayuh agi bup ti bisi kualiti enggau bepelasarka fakta ungkup rebak dudi.

Ba pengujung pengerami, Premier Sarawak udah nyuaka anugerah ngagai bala pemenang.

Ungkup kategori dichelak DBP, bup ‘Empurau: Ikan Eksotik Sarawak’ asil karya dikarang begulai Emilyn Badut, Mohd Saiful Maifin enggau Siti Hawa Mohamad Ali mujur mai pulai perais mata duit RM8,000 sereta setipikit diaku enggau bup dichelak DBP.

Seraya ungkup kategori dichelak luar, bup ‘Negeri Santubong: Sejarah Awal Sarawak 300 ESS-1647 ES’ asil dikarang Datu Dr Sanib Said mujur mai pulai perais mata duit RM5,000 sereta setipikit diaku enggau bup dichelak DBP.

Sama datai, Sekretari Perintah Sarawak, Datuk Amar Mohamad Abu Bakar Marzuki; Sapit Menteri Pelajar, Inovasyen enggau Pemansang Penau Sarawak, Datuk Dr Annuar Rapaee; Sapit Menteri Di Opis Premier Sarawak (Integriti enggau Ombudsman), Datuk Dr Juanda Jaya; Kaban Kunsil Nengeri (ADUN) Daro, Safiee Ahmad; tuai opis sereta temuai dipebasa bukai. – EDISI UKAS