TEBEDU: Serian nyadi palan ketiga ba siri Jelajah Agrofest diatur Opis Betanam Betupi Sarawak renggat bagi menua nyerumba Sarawak Agrofest 2025 ti deka diatur belabuh ari 22 ngagai 31 Ogos 2025 di Bintulu.

Program Serian Agrofest 2025 ti diatur pengelama tiga hari nyelinting penatai urung 4,000 mensia mayuh enggau nambah penatai pemisi RM100,000, nengah pemandang produk sereta teknologi pemadu baru ba sektor betanam betupi.

Program tu diatur Opis Betanam Betupi Bagi Menua Serian di Dataran Mutiara, Tebedu belabuh ari pukul 2.30 lemai nyentuk 5 lemai.

Bisi 62 reruai dibuka ba edisyen sekali tu baka 30 reruai agensi perintah enggau 32 reruai pedagang sereta kompeni kelimpah mandangka pemandang laman nupi jelu ti deka narit ati mensia mayuh.

Entara agensi ti ngambi bagi nyengkaum Opis Betanam Betupi Sarawak, Opis Servis Veterinar Sarawak, Kaunsil Industri Getah Sarawak (SARIB) enggau kompeni betanam betupi ti chakah dikemansang di nengeri tu.

Tambah mega, festival sekali tu bisi ngatur “Panu Birantan” tauka Pengawa Bejalai Bebala Mayuh Gawai ti ukai semina digulu suku raban bansa Dayak baka Bidayuh, Iban enggau Orang Ulu, tang mega komuniti Melayu enggau China di Bagi Menua Serian.

Program Serian Agrofest 2025 udah dipenyadi Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom di Dataran Mutiara Tebedu kena Hari Lima.

Sama datai, Sapit Menteri (Industri Pemakai), Datuk Dr Abdul Rahman Ismail, Sapit Menteri (Komoditi enggau Pemansang Kandang Menua), Datuk Martin Ben, Kaban Parlimen Serian Dato’ Sri Dr. Richard Riot Jaem, ADUN Tebedu, Dr. Simon Sinang Bada, ADUN Bukit Semuja, John Ilus, Sekretari Mendam Opis Menteri Industri Pemakai, Komoditi enggau Pemansang Kandang Menua Sarawak, Datu Sirai Daha, Residen Bagi Menua Serian, Caroline Cleophas Joseph enggau Direktor Opis Betanam Betupi Sarawak, Dominic Chunggat.

Pia mega, sekeda pedagang menua udah nerima Anugerah Pedagang Jaya nengah pemujur ba sektor betanam betupi iya nya Polok Lakeng (Utai Tanam), Tan Yek Hong (Industri Asas Tani), Chua Hua Beng, Akuakultur (Berikan Darat) dan Emmanuel Henry Bujang (Nupi Jelu). -EDISI UKAS