MIRI: Pengerami muzik ikonik, Festival WAK Miri 2025 deka ngerichah mengeri dagang temuai nya belabuh ari 13 ngagai 15 June tu nengah pemerindang seni enggau budaya.
Pengawa bejadi kalinda festival nya dipenyadi Sapit Datuk Bandar Miri, Tuan Haji Ariffin Mohamad ti diatur Dewan Bandaraya Miri kena Hari Lima.
Maya bejaku, Ariffin madah, WAK Miri nya entara inisiatif pemadu besai ngangkatka ekosistem kreatif di mengeri tu.
Iya mega meri terima kasih ngagai raban pengatur enggau semua raban ti udah ngemujur festival nya.
“Festival tu ukai semina pemerindang tang siti aktiviti komuniti ti nyeremin Miri – siti mengeri ti kreatif, inklusif enggau ngembuan mayuh semangat begulai,” ku iya.
Ku iya, edisyen keterubah festival ba taun nyin tadi ukai semina meri empas positif ngagai komuniti lokal tang mega matak minat pengusung luar seraya ngangkatka Miri nyadi palan seni enggau budaya serantau.
Edisyen sekali tu deka ngemata bemacham program narit ati baka teater, pemerindang muzik, pemandang seni visual, mandangka pisin, bengkel kreatif sereta aktiviti ruang bilik ti deka bepalan di Pusat Kraftangan Miri enggau endur bukai di mengeri nya.
Entara pekara ti narit ati nyengkaum Emily of Emerald Hill iya nya teater solo ikonik dilakun Pearlly Chuah ti eksklusif di Kebaya Story, enggau bisi ngirup lemai.
Bisi mega pemerindang khas raban instrumental Time Signature ari Kuching enggau Pemandang visual visual Into the Wild & All About Arts ari artis Sarawak.
Pengawa mandangka pisin mega bisi diatur penengkebang pisin Edric Ong enggau Melor by Melinda Omar, ti kala dipandang di London Fashion Week diiring Set DJ sepanjai hari ari bala DJ tebilang baka DJ Dora, DJ Mago, DJ Raafiikii enggau DJ 40%.
Festival nya mega nyendiaka bemacham bengkel narit ati baka bengkel ngaga sabun aromatik DIY, program mural begylai Mercure Beyond Art Festival, sereta aktiviti komuniti.
Menijar Festival, Brendan Chin madah ke festival nya nalan mantaika penau seni seraya ngaul komuniti ti besai agi ba dunya seni.
Festival tu diatur raban What About Kuching (WAK) nengah sukung penuh Opis Menteri Dagang Temuai, Industri Kreatif enggau Seni Pemerindang Sarawak (MTCP) sereta kerejasama rat Majlis Bandaraya Miri.
Besulu ke jaku “Daripada Komuniti, Untuk Komuniti”, WAK Miri 2025 ukai semina disadang nyadi pelasar pemandang seni ti tebilang tang mega nyadi penyungkak pemansang budaya enggau ekonomi kreatif lokal. – EDISI UKAS
