KUCHING: Elawin Kaban Kunsil Nengeri (ADUN) Sarawak ke bisi datai ngulu Aum Kunsil Nengeri (DUN) Sarawak deka ditikika nyadi RM450 sehari enti dibanding RM50 sebedau tu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ba Kaban Parlimen ke ngulu Aum Dewan Rakyat sida nerima elawin RM400 sehari.

"Aku udah betanya ngagai Speaker DUN Tan Sri Datuk Amar Mohamad Asfia Awang Nassar ti madah ngagai aku ADUN Sarawak nerima RM50 sehari tang Kaban Parlimen RM400 sehari.

"Nya alai kitai deka nambahka elawin tu ari RM50 nyadi RM450 sehari.

"Aum DUN Sarawak diatur lapan hari alai semua elawin ke dibayar kitai urung setengah juta.

"Sarawak bisi penatai ke chukup dikena kitai mayar elawin tu," ku iya madah.

Iya bejaku munyi nya maya Gabungan Parti Sarawak (GPS) Backbencher’s Night ditu, Hari Tiga.

Kelimpah ari nya, Premier Sarawak mega madah, pengawa nyerenih baru gaji orang kereja perintah bepanggai ba pemutus kepenudi ke digaga Perintah Besai.

"Kitai ngena penerang ari pemutus sida.

"Tang nyangka gaji orang kereja perintah Sarawak manah agi ari Perintah Besai," ku iya madah.

Bela datai maya nya bini Premier Sarawak, Puan Sri Datuk Amar Juma'ani Tun Tuanku Bujang, Sapit Premier Sarawak, Datuk Amar Profesor Dr Sim Kui Hian enggau bini Datin Amar Enn Ong Siok Ean, Speaker DUN Sarawak, Tan Sri Datuk Amar Mohamad Asfia Awang Nassar, Tuai Whip DUN GPS, Dato Ibrahim Baki enggau bala pemesai GPS ke bukai.-EDISI UKAS