KUCHING: Opis Menteri Utiliti enggau Telekomunikasyen Sarawak majak ngenegap atur industri gas ba kandang menua tu nangkan ubah Ordinan Nyadung Gas 2016 (DGO 2016) ti dikemendar ba taun 2023.

Sapit Menteri Utiliti (Sarawak Energy Berhad enggau PETROS), Dato Ibrahim Baki madah, kenyau ari ubah nya diterit, opis menteri iya udah ngatur macham chara strategik dikena nentuka pengawa ba sektor gas dipejalai enggau berurun, likun sereta nitih undang-undang.

“Nyentuk diatu, bisi 14 lisin udah diberi ngagai pemain industri ulu lalu 537 lisin diberi ngagai pemain industri ili nengah DGO 2016 dikena sida bejalaika operasyen enggau chara ti betul sereta nitih undang-undang di Sarawak,” ku iya.

Iya madah munyi nya maya nimbal tanya ari Kaban Kunsil Nengeri (ADUN) Daro, Safiee Ahmad ba Aum Kunsil Nengeri (DUN) Sarawak Ke-19, ditu, Hari Empat.

Nerang silik, iya madah, pengeransing nya ukai semina ngembuan tuju dikena ngemanahka tikas nitih undang-undang ti ditetapka tang mega meransang pemansang industri kuasa enggau chara meruan.

Kelimpah ari nya iya madah, opis menteri iya mega nerit atur ba orang dagang ti enda nituh undang- undang enggau meri 10 notis enggai nitih atur ngagai bala bejalaika pengawa nyadung gas nadai lisin.

“Lalu nya mandangka penerit kami ba pengawa nentuka tiap iti aktiviti ba sektor gas diatur enggau mujur dikena nyamin pengelikun mensia mayuh sereta pemeruan bekal kuasa di Sarawak,” ku iya.

Nambah ke jaku iya, Dato Ibrahim madah, sekeda ari pengawa ti begunaka lisin nengah DGO 2016 nyengkaum pengawa ngimport, regasifikasyen, proses, ngangkut, ngaga paip, mekal sereta nyual gas.

"Sida ti nadai lisin tau diukum manggai RM20 juta ba penyalah keterubah lalu 10 kali lipat ungkup penyalah nangkan ke nya,” ku iya nerang baru.-EDISI UKAS