KUCHING: Rang Undang-Undang (RUU) (Ngererak) Tabung Amanah Pemansang Infrastruktur 2025 udah dikemendar pengudah dipejurai kali ketiga ba Aum Kunsil Nengeri (DUN) Sarawak Ke-19, Hari Tiga.

Speaker DUN Sarawak, Tan Sri Datuk Amar Mohamad Asfia Awang Nassar ngemendarka RUU nya sepengudah lapan iku Kaban Kunsil Nengeri (ADUN) ngambi bagi ba bejuraika RUU nya.

Menteri Infrastruktur enggau Pemansang Penyangkai Kapal, Datuk Amar Douglas Uggah Embas ti bejuraika RUU nya madah, Tabung Amanah Pemansang Infrastruktur ti ditumbuh ari baruh Ordinan 1985 udah mujur nyaup tuju asal penumbuh lalu enda engkeman diguna agi ketegal ubah pemansang diatu.

“Tuju penumbuh turu tu dikena nyendiaka agih belanja ti berurun ari Agih Belanja Nengeri dikena melanja pemansang infrastruktur baka jalai alun, bekal ai enggau karan ba kandang menua baru dikemansang," ku iya.

Belanja nya mega ngembuan tuju nyaup kompeni ngaga rumah peribit ngelempungka ungkus ngepun ke pengawa ti besai ba pemansang infrastruktur lalu ngerumban pejalai projek pemansang ti udah dikemendar.

Taja pia, ku iya, ba konteks ekonomi sehari tu, mayuh kompeni peribit udah ngembuan pekara wang ti entap sereta bisi pengulih ngulihka belanja projek ari institusyen pekara wang.

“Kelimpah ari nya, Perintah Sarawak udah ngenegap fiskal sereta atur belanja enggau lebih strategik agi. Tu ngulihka mayuh agi belanja diagih terus ungkup pemansang infrastruktur ba selampur nengeri," ku iya madah baru.

Nya alai, pemutus ngererak turu nya lalu madamka Ordinan Tabung Amanah Pemansang Infrastruktur 1985 siti pemutus ti engkeman.-EDISI UKAS