KUCHING: Kunsil Nengeri (DUN) Sarawak kena Hari Dua tu tadi udah ngemendar Rang Undang-Undang (RUU) Opis Bekuasa Menua (Ubah) 2025, ngelai siti agi singkang signifikan ba pengawa ngenegap administrasyen perintah lokal di Sarawak.

Pemutus nya dipadah Speaker DUN Sarawak, Tan Sri Datuk Amar Mohamad Asfia Awang Nassar, sepengudah nerima sukung mayuh ari bala Kaban Kunsil Nengeri (ADUN).

Sapit Premier Sarawak ke mega Menteri Pengerai Mensia Mayuh, Pengawa Berumah enggau Perintah Lokal, Datuk Amar Profesor Dr. Sim Kui Hian madah, ubah nya beguna nentuka undang-undang ke dikena seruran engkeman.

“Sepengudah lima taun, udah maya nyerenih baru sekeda RUU ba ordinan tu dikena nipak ubah enggau pengelantang rayat maya diatu,” ku iya nerang maya bejuraika RUU nya kali kedua ba Aum DUN Sarawak Ke-19.

Ku Datuk Amar Profesor Dr. Sim, semua 27 opis kaunsil ba baruh opis menteri iya nyengkaum tiga kaunsil baru iya nya Kaunsil Pelilih Gedong, Kaunsil Pelilih Sebuyau enggau Kaunsil Pelilih Siburan ngemeran sistem pengari Kaunselor ba administrasyen sida.

“Enggau rayat ke majak nambah, kelebih agi ba kandang mengeri ti benung mansang, peminta enggau guna rayat mega nyau majak mayuh.

"Nya alai, udah maya pengari ba renggat komuniti dikerembai dikena nentuka bala rayat bulih servis ti mujur agi,”ku iya.

Nerang silik senentang nya, Datuk Amar Profesor Dr. Sim madah, Ubah Seksyen 10, 10A enggau 11 ngembuan tuju nambah penyampau kaunselor ari 30 ngagai 33 iku, ungkup lima opis kaunsil besai iya nya Kaunsil Mengeri Kuching Selatan, Kaunsil Mengeri Miri, Kaunsil Mengeri Sibu, Kaunsil Mengeri Padawan enggau Kaunsil Mengeri Kota Samarahan.

Lalu ba Ubah Seksyen 172A ku iya, meri kuasa ngagai Kaunsil Aum Perintah Nengeri ngubah semua pekara ba ordinan nya.

"Tiap iku kaunselor diberi pengawa enda sama lalu pemutus nambah kaunselor tu deka nyaup ngemanah agi pengawa matau projek sereta meri servis," ku iya madah baru.-EDISI UKAS