KUCHING: Rang Undang-Undang (RUU) Kanun Tanah (Ubah), 2025 deka ngenegapka pengawa nerit atur sereta nyerenih pengawa bekaul ngatur tanah enggau teknologi digital, lebih agi ngira pemesai guna diatu ngagai rayat sereta nyamin pemeruan pemansang nengeri.

Kaban Kunsil Nengeri (ADUN), Abdul Yakub Arbi madah, ubah baru tu ngembuan tuju mutarka penyalah bekaul tanah ti majak nambah baka pengawa ngeruga tanah, berumah ba tanah nengeri sereta ngambi pengeraja asal enda nitih atur.

Ku iya, sebagi ari pekara ti diserenih ke besai guna iya nya, negap atur lisin enggau ukum baru pengawa ngambi, ngempu enggau ngangkut kereban batu, lebih agi maya kereban nya dibai pansut ari menua Sarawak.

"Ukum paling mayuh ke diatu sepenyampau RM5,000 udah enda engkeman agi. Penyalah baka ngambi kereban batu dieksport ngagai menua bukai majak nyadi laban penguntung besai agi dibanding enggau ukum," ku iya nerang.

Iya madah munyi nya maya bejuraika Rang Undang-Undang (RUU) Kanun Tanah (Ubah), 2025 ba Aum Kunsil Nengeri (DUN) Sarawak Ke-19, Hari Dua.

Nambah ke jaku iya, iya madah, pengawa nyerungkai enggau betanam betupi enda nitih atur ba tanah nengeri ukai semina ngeruga pelin pemansang ti diperambu, tang bela ngeruga pemeruan rampa menua.

Senentang transformasyen digital, Abdul Yakub madah, ubah nya mega nengkebang chara moden proses peminta pemansang tanah enggau chara digital.

Nitih ku iya, sebagi ari chara signifikan iya nya ngena sistem eSPA ke nganti proses manual nyua enam salin pelin fizikal sebedau tu lalu eSPA nya deka meri pemaik ngagai agensi perintah enggau bala ba sektor peribit.

“Tu ukai semina perengka guna tang senentang nengkebang sistem ti lebih responsif, ulih diandal enggau puh seriris enggau visyen Sarawak nyadi nengeri pintar, inklusif sereta bepelasarka teknologi,” ku iya nampung baru. -EDISI UKAS