KUCHING: Tiga seksyen baru ke digaga ba Rang Undang-Undang (RUU) Kanun Tanah (Ubah) 2025 disadang deka mai ubah besai ba pengawa Sarawak ngatur enggau nyaga pengeraja asal ari tanah.

Sapit Premier Sarawak, Datuk Amar Awang Tengah Ali Hasan madah, tiga seksyen baru tu iya nya Seksyen 32AA, Seksyen 171A enggau Seksyen 234A nyadi pugu ngenegap undang-undang tanah nengeri.

Ku iya, ba Seksyen 32AA, Perintah Sarawak bisi kuasa ngatur pengawa ngangkut batu ngilah entara Sarawak ti ngemendarka nagang sapa-sapa ke deka mai batu nadai lisin ari opis bekuasa.

"Sida ti ngereja penyalah tu deka ditinggang ukum abis mimit RM100,000 lalu pemadu mayuh RM1 juta tauka dijil nyentuk lima taun tauka dua iti ukum nya sekali," ku iya madah.

Iya nerangka pekara nya maya bejuraika RUU Kanun Tanah (Ubah) 2025 renggat kedua ba Aum Kunsil Nengeri (DUN) Sarawak Ke-19 ditu, Hari Dua.

Ku iya, pemutus nya deka nambah ubah Seksyen 32A ke endang udah bisi lalu besaup ngelangkar undang-undang senentang mansut, pemindah enggau eksport kereban batu.

Kelimpah ari nya, Datuk Amar Awang Tengah ke mega Menteri Pengeraja Asal enggau Pemansang Mengeri II madah, Seksyen 171A ke baru deka numbuhka atur ngerejista Tanah Wakaf Agama.

Ba tuju nyukung juluk ati digital Sarawak, ku iya, Seksyen 234A ke baru deka nentuka guna nyua pelin utiliti ke bendar (as-built utility plans) sepengudah projek pemansang tembu digaga.

Iya madah, seksyen tu disikap enggau ubah ba Seksyen 234 ke diatu ngemendarka pengawa nyuaka dokumen tanah enggau chara digital. -EDISI UKAS