KUCHING: Perintah Sarawak nengah Opis Menteri Industri Pemakai, Komoditi enggau Pemansang Kandang Menua udah nentuka 4,264 hektar tanah di Sitak Limbang engkeman alai bumai chara moden enggau komersil.

Ku Sapit Menteri Industri Pemakai, Komoditi enggau Pemansang Kandang Menua, Datuk Maclaine Ben @ Martin Ben ari semua pemesai tanah nya, 2,734 hektar ba enam kandang endur di Pelilih Limbang.

Ke bukai, 1,530 hektar agi ba lima kandang endur di Pelilih Lawas.

Iya madah munyi nya maya nimbal tanya ari Kaban Kunsil Nengeri (ADUN) Batu Danau, Dato Paulus Palu Gumbang ba Aum Kunsil Nengeri (DUN) Sarawak Ke-19, Hari Dua.

Tu sebagi ari pengeransing perintah nengeri ngenegap pengelikun bekal pemakai lalu ngurangka pengawa bepanggai ba beras ari menua bukai.

Projek bumai enggau chara komersil tu mega disadang deka nengkebang pengawa puang sereta nambah penatai pemisi baru ungkup komuniti menua pesisir, seriris enggau pekara pemansang kandang menua ti inklusif enggau meruan.-EDISI UKAS