KUCHING: Opis Menteri Infrastruktur enggau Pemansang Penyangkai Kapal (MIPD) benung ngelanggur Pelin Besai Palan Penyangkai Kapal Sarawak ti komprehensif ke ngembuan tuju nyendiaka inisiatif strategik ungkup pemansang penyangkai kapal selampur nengeri, seriris enggau polisi pemansang ba kandang utara, tengah enggau selatan.
Sapit Menteri Infrastruktur enggau Pemansang Penyangkai Kapal Sarawak, Dato Majang Renggi madah, Penyanding Penemu Penyangkai Kapal enggau Tim Pengereja Pengawa udah dichiri nyadi tuai ngatur pelin besai nya.
Ku iya, tu nyengkaum pengawa ngumpul data ari bala ke bekaul, belajar ari palan penyangkai kapal antarabansa lalu nentuka penyangkai kapal Sarawak ba penuduk ti engkeman nyungkak pemansang ekonomi timpuh panjai enggau pengulih besemekih ba rantau tu.
“Pelin tu deka bisi inisiatif strategik seriris enggau tanggungpengawa Komiti Penyangkai Kapal Sarawak ke nempa pengawa palan penyangkai nyadi siti entiti bepalan,” ku iya madah.
Iya madah munyi nya maya nimbal tanya Kaban Kunsil Nengeri (ADUN) Tanjong Batu, Johnny Pang Leong Ming ba Aum Kunsil Nengeri (DUN) Sarawak Ke-19, Hari Dua.
Kelimpah ari nya, iya mega madah, Komiti Penyangkai Kapal Sarawak (SarPA) ti baru deka nyadi kaunsil pengatur semua palan penyangkai kapal ba nengeri tu.
“SarPA deka ngempu Pelin Besai Palan Penyangkai Kapal Sarawak lalu ngesan tanggungpengawa ngaga polisi, atur, nyaup pengawa pemansang sereta nentuka pengawa ngatur ti konsisten, efisyen setipak enggau tuju ekonomi timpuh panjai Sarawak,” ku iya nerang.
Dikena nentuka MIPD nipak guna semua palan penyangkai kapal besai ba Sarawak, Dato Majang madah, opis menteri iya deka bekaul rat enggau agensi nengeri, bala ke bisi kuasa ba palan penyangkai kapal ke diatu, pengatur terminal enggau pemekuh industri ngambi nentuka Pelin Besai tu ulih mandangka tanggungpengawa enggau guna tiap buah palan penyangkai kapal.
Nerang silik agi, iya madah, tu nyengkaum pengawa meresa data enggau taba ti deka nyaup strategi pemansang ti responsif enggau pengulih besemekih serantau. - EDISI UKAS
