KUCHING: Kompeni enggau rayat Sarawak diperansang bela ngambi bagi ba industri microalgae ke benung digaga perintah nengeri.

Sapit Menteri Kuasa enggau Pemeruan Rampa Menua Datuk Dr Hazland Abang Hipni madah, tiga bengkah pekara digaga ba industri tu iya nya nanam enggau ngetau microalgae, ngasilka minyak mata enggau ngaga biojisim lumut nyadi produk baka pemakai jelu, nutraseutikal enggau pharmaseutical.

"Taja pia, belanja ke chukup meseti dikemeratka dulu dikena ngaga projek tu," ku iya madah maya nimbal tanya Kaban Kunsil Nengeri (ADUN) Krian, Friday Belik ba Aum Kunsil Nengeri (DUN) Sarawak Ke-19, Hari Dua.

Iya mega madah, SEDC Energy Sdn Bhd mega benung bejalaika pansik berati pun penatai ke bukai ti engkeman dikena ngaga 'sustainable aviation fuel (SAF).

"Tu nyengkaum baka minyak makai ke udah dikena, rumput tasik, teda betanam betupi enggau biojisim," ku iya madah baru.

Kelimpah ari nya, ku iya, projek microalgae di Sarawak bela betapi enggau beberapa iti penguji baka ubah klimet enggau belanja ke besai laban begunaka teknologi moden baka sensor 'artificial intelligence' (AI).

"Ukai semina nya, penguji bukai nyengkaum pekara nambahka asil tauka 'upscalling' dikena nipak peminta dunya ba kereban mata bio tauka 'bio feedstock'," pia ku iya. -EDISI UKAS