KUCHING: Kerejasama Petroleum Sarawak Berhad (PETROS) enggau Petroliam Nasional Berhad (PETRONAS) meseti bisi pemutus ketegal ngira pengelantang nengeri enggau menua tu.

Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar madah, Menteri Besai Dato Seri Anwar Ibrahim enggau Perintah Besai udah setuju enggau pemutus Perintah Sarawak nyiri PETROS nyadi gas aggregator tunggal di Sarawak ke digaga nengah Distribution of Gas Ordinance (DGO) 2016 alai perintah nengeri bisi kuasa eksekutif enggau legislatif.

Ku iya, tu seriris enggau rekomendasi ari Ripot Komiti Antara Perintah (IGC) 1962 ke udah dipejalai nengah Borneo States (Legislative Power) Order 1963 digaga Yang di-Pertuan Agong nitihka Artikel 95C Konstitusyen Perintah Besai.

"Hak konstitusyen tu meseti dipebasa ngambika PETROS ulih bejalaika tanggungpengawa nyadi gas aggregator nentuka pemansang industri gas di Sarawak semampai nyaup ekonomi menua enggau Sarawak empu.

“Aku ngarapka kerejasama PETROS enggau PETRONAS bisi pemutus enggau lengkas laban tu deka mai mayuh penguntung ba industri minyak enggau gas di Sarawak sereta mulai pengelantang ngagai menua tu enggau Sarawak," ku iya.

Iya bejaku munyi nya maya pengawa bejadi Aum Kunsil Nengeri (DUN) Sarawak Ke-19, Hari Satu.

Ba pekara bekaul peminta Sarawak ngagai Perintah Besai, Tun Pehin Sri Dr Wan Junaidi madah ke diri berasai lantang ati laban kaul nya endang manah alai mayuh pekara ulih diputar senentang hak nengeri tu.

Iya andal kaul nya bela deka ngemujurka Sarawak ngambi semua hak ba Sempekat Malaysia 1963, Ripot IGC, Konstitusyen Perintah Malaysia enggau Konstitusyen Sarawak.

"Aku ngarapka semua peminta Sarawak ulih diputar Perintah Besai enggau lengkas.

" Aku mega minta Perintah Besai bejalaika tanggungpengawa sida ba pekara pemansang ekonomi, rama enggau pengelikun Sarawak, " ku iya madah baru.

Bela datai maya nya, Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg, Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof Dr Sim Kui Hian, Speaker Kunsil Nengeri Sarawak Tan Sri Datuk Amar Mohamad Asfia Awang Nassar, raban Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, raban Sapit Menteri Kabinet Sarawak, Kaban Kunsil Nengeri (ADUN) sereta pemesai ke bukai. -EDISI UKAS