SIBU: Tuai Genturung Pendiau enggau Tuai Raban Bansa (KMKKK) ke baru dichiri ba sitak Kunsil Nengeri (DUN) Dudong dilalau bejalaika pengawa enggau integriti, lurus ati sereta profesional lalu enda beambi ulih ari penuduk sida tauka ketegal tuju penguntung diri ba politik.

Menteri Dagang Temuai, Seni enggau Budaya ke mega Kaban Kunsil Nengeri (ADUN) Dudong, Dato’ Sri Tiong King Sing nyemetak madah ke pekara nya maya bejadika Pengawa Nyua Setipikit Chiri KMKKK Pelilih Sibu ditu, apin lama tu tadi.

“Berengkah sehari tu, kita megai tanggungpengawa nyadi 'jematan' ti efektif entara perintah enggau rayat, ngenataika polisi enggau terang, ngatur pekara peranak menua sereta nentuka pengelantang rama diintu,” ku iya.

Iya mega ngelalau KMKK enda beambi ulih ari penuduk ketegal tuju politik diri.

Dato’ Sri Tiong mega madah ke pengirau ati senentang pengelaun proses nyiri ketegal penanggul politik, ti ku iya tau nanggul pemansang sosioekonomi menua sereta ngemediska rayat.

Iya mega ngelalau ngambi ke semua bala ti bekaul masa proses bepilih nya lalu nyerah pengawa ngagai tuai ke patut sereta ransing ngereja pengawa ungkup rayat.

Pengawa sehari nya diatur Opis Pelilih Sibu bela digulu Sekretari Politik Premier Sarawak, Joshua Ting Fu Ying, Pegawai Pelilih Sibu, Wee Teck Min, pengari Residen Sitak Sibu, Haider Kowel Bete enggau Temenggong Stanley Geramong Bandar.-EDISI UKAS