SIMUNJAN: Peranak Kampung Pantong Iban diatu nyau berasai lantang ati sepengudah projek jalai baru 500 meter pemanjai udah tembu kena Ogos taun siti tadi.
Projek tu sebagi ari inisiatif Opis Menteri Pemansang Genturung enggau Kandang Menua (KKDW) ti ngembuan tuju ngemanahka jalai enggau pengelantang peranak menua pesisir.
Pengawa bejadi jalai nya udah dipenyadi Kaban Parlimen Batang Sadong, Rodiyah Sapiee enggau Kaban Kunsil Nengeri (ADUN) Simunjan, Awla Dris ba Program Bejadi Jalai Genturung Pendiau & Mantar Gawai Dayak 2025 ti diatur JKKK Kampung Pantong Iban, kena Hari Minggu tu tadi.
Rodiyah madah, jalai nya digaga asil ari peminta iya enggau Awla ngagai KKDW.
“Projek jalai tu besai reti ngagai peranak menua tu lalu nyadi ke kelai pengeransing perintah Sarawak dipegai Gabungan Parti Sarawak (GPS) ti betuai ke Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ba pengawa ngenegapka perengka guna menua pesisir,”ku iya lebuh bejaku ba program nya.
Iya mega nyemetak madah pemesai guna pemansang menua pesisir ti ukai semina naka ngaga jalai alun, tang nyengkaum pengawa ngaga sereta nyeleti jematan, titi, balai mayuh guna enggau perengka guna ke bukai.
“Bala kami semampai nyukung enggau berati tiap iti peminta ari genturung pendiau.
"Tiap genturung ngembuan guna ke enda sebaka. Bisi ke begunaka jalai, balai baru, bisi mega begunaka titi ungkup guna ninting hari. Pekara tu dikemerat bepelasarka randau begulai enggau tuai genturung sereta peranak menua nya empu,” ku iya.
Rodiyah mega madahka pengeransing bekerejasama rat enggau ADUN Simunjan ba ngatur projek pemansang genturung ba kandang menua nya.
Serimbai ngintu Mantar Gawai Dayak, iya mega ngarapka Hari Gawai taun tu mai semangat baru sereta negap penyerakup rayat.
Berebak enggau nya, ADUN Simunjan, Awla Dris ngelalau peranak genturung pendiau dia enda takut minta projek pemansang ke ulih meri pemaik ngagai sida.
Nitih ku Awla, mayuh chara minta agih belanja ungkup pemansang genturung pendiau nyengkaum nengah Opis Menteri Pemansang Genturung enggau Kandang Menua (KKDW), Opis Pemansang Nengeri Sarawak (SDO) kelimpah ngena agih belanja Projek Transformasyen Menua Pesisir (RTP).
Nambah ke jaku iya, Awla madah, entara projek ke amat diperansang dipinta nyengkaum pengawa ngaga jalai penyambung genturung enggau jalai kebun ti besai guna ungkup peranak menua pesisir, lebih agi ngagai orang ke betanam betupi.
“Jalai baka tu besai reti dikena ngemuntangka bala ke betanam betupi mai asil tanam sida ngagai palan ngumpul tauka ngagai makit. Enti perengka guna tu bisi, penatai pemisi peranak menua pesisir mega tau nambah,” ku iya.
Iya mega madahka pengeransing bekerejasama enggau tuai bukai ba sitak Simunjan nyengkaum Kaban Parlimen Batang Sadong, Rodiyah Sapiee nentuka tiap genturung pendiau bulih pemansang infrastruktur ti patut.
Sama datai ngerichahka pengerami nya, Penghulu Jubin Sili, Chairman JKKK Kampung Pantong Iban, Tr. Gabriel Elisha Tinos, Tuai Zon 3 Sungai Apin, Kr. Mohamad Alsagaf Mohd. Jaafar sereta tuai raban bansa kandang Zon 3 Sungai Apin.-EDISI UKAS
