KUCHING: Perintah Sarawak diatu meri perati ba pengawa ngalih ngagai ekonomi baru bepelasarka teknologi, pengelandik enggau produktiviti, seraris enggau aspirasyen Strategi Pemandang Pengudah COVID-19 (PCDS) 2030.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah ke sida meri perati ngagai sektor strategik baka kuasa ulih dikena baru, ekonomi digital enggau ubah klimet global ti udah meri pangka terus ngagai landskap ekonomi dunya.
“Ka tauka enda, kitai meseti ngiga tunga kuing ti betul. Nya kebuah kitai begunaka latih sereta pengelandik kelebih agi ari sukut disiplin teknikal.
“Dulu ari nya, Chairman Kongres Serakup Pengereja Malaysia (MTUC) Sarawak, Zaidi Nasar madah ke pemesai guna pengelandik enggau nambah pengelandik (skill and upskilling).
“Kebuah pia laban ekonomi kemaya hari nadai agi bepanggai aja ngagai penemu ti diulih ari bup ba sekula,” ku iya serimbai Pengerami Hari Pengereja Renggat Sarawak di Hikmah Exchange kena Hari Minggu.
Iya nyemetak madah, ba jeman teknologi moden nyengkaum pengawa ngena Artificial Intelligence (AI), pengereja tetap ngembuan tanggungpengawa besai tang ngena pengelandik ti tinggi agi enggau teknikal.
“Tang, pengereja ti diguna iya nya pengereja pintar (smart worker). Smart worker, smart salary – laban produktiviti sida setipak enggau pengelandik ti dikembuan,” terang iya.
Ku iya agi, Sarawak enggai diperekuh ekonomi ungkus tinggi enggau produktiviti ti baruh. Tang, pengawa ngena teknologi deka nyadi kereban besai nyapai penyikar sereta ngelimat ungkus ba semua sektor.
“Kitai enggau ekonomi tinggi ungkus tang produktiviti baruh. Enda ngawa ungkus tinggi, asal mih efisyen. Teknologi tu ulih ngasuh kitai bekelimat. Gaji tinggi pen enda ngawa asal mih produktiviti seikas,” ku iya.
Inisiatif tu nyata nyeremin pengeran perintah nengeri mai Sarawak nuju status nengeri bepenatai pemisi tinggi manggai 2030 lalu meri perati ngagai modal mensia ti bekualiti sereta bepengelandik tinggi napi pemar ekonomi dudi hari.
Sama datai, Sapit Premier Sarawak Datuk Amar Prof Dr Sim Kui Hian, Sekretari Perintah Sarawak Datuk Amar Mohamad Abu Bakar Marzuki, Sapit Menteri Di Opis Premier Sarawak (Pengereja Kasar, Imigresyen enggau Patau Projek) Datuk Gerawat Gala, bala Sapit Menteri nengeri, Luyar Besai Sarawak Dato Sri Saferi Ali, Sekretari Besai Sarawak Dato Ahmad Nadzri Mohd Hassan, Sapit Sekretari Perintah Sarawak (Perambu Ekonomi enggau Pemansang), Dato Sri Dr Muhammad Abdullah Zaidel, Sapit Sekretari Perintah Sarawak (Atur Pengawa), Datu Buckland Bangik, tuai opis sereta temuai dipebasa bukai. – EDISI UKAS
