KUCHING: Bisi 117 nembiak nyulut ari sitak Batu Kawa ti bulih pemutus nyulut ba peresa Sijil Pelajaran Malaysia (SPM) enggau Unified Examination Certificate (UEC) udah nerima setipikit sereta insentif ba sebengkah pengawa ti diatur begulai opis ADUN Batu Kawa di Kuching kena Hari Enam.

Anugerah nya udah disuaka Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal sereta Kaban Kunsil Nengeri (ADUN) Batu Kawa, Datuk Amar Prof Dr Sim Kui Hian.

Semua penerima anugerah bulih abis nadai 5A ba peresa sida lalu ari nembiak SMK Batu Kawa, SM Min Lit Batu Kawa sereta SMK Jalan Arang.

Bisi nembiak ari sekula sekondari bukai ti ngentapka diri ba sitak Batu Kawa mega nerima anugerah nya.

Datuk Amar Dr Sim madah, pengawa ngatur pengerami nya dikena ngaku enggau meransang bala nembiak ba penyulut akademik sida ti ngemegah.

“Ninting taun, mayuh nembiak ari Batu Kawa pas enggau pemutus nyulut ba peresa perintah.

“Tu nunjukka tikas pelajar ti tinggi sereta pengeransing apai indai enggau pengajar nyeridi anak kitai,” terang iya.

Iya nyemetak madah, Sarawak udah udah nempa mayuh orang mujur ba bemacham bidang nyengkaum siku pemansik riman betikas antarabansa asal ari nengeri tu nunjukka penau besai rayat Sarawak.

Nambah ke nya, iya mega bekunsi pemujur numbuhka Palan Tungkul Sengayuh Sarawak enggau pakar lokal nyentuk diatu nyadi entara hospital pakar tebilang di rantau tu.

Pia mega, ADUN Batu Kawa nya nyebut Hospital Besai Sarawak diatu mega diaku ba renggat antarabansa ba sekeda penau.

Ku iya, Perintah Sarawak naka ulih negap pemansang pelajar enggau nyendiaka bemacham insentif sereta pemaik nyengkaum pelajar tinggi pechuma nengah lima universiti penggi perintah nengeri ngambi nempa mayuh agi pengereja landik. – EDISI UKAS