BAU: Pengerami Tasik Biru 2025 ti diatur serimbai Genap Taun Ke-205 Pelilih Bau terus narit perati lebuh beribu pengusung napatka taba pengerami ngambi meda Konsert Rayat ti richah diatur malam tadi.

Konsert nya mandangka bala artis lokal enggau antarabansa nyengkaum Remix R2 Band, Baby Shima, Wooden Gun (Daari Gap), sereta penanyi ari Pontianak, Indonesia, Wenny Zhu.

Pemanah sada nyawa sida ukai semina merindang tang mega meransang bala pengusung terus nyukung pengerami ti diatur ninting taun nya.

Sapit Menteri Pengangkut Sarawak (Sungai enggau Tasik) ti mega Kaban Kunsil Nengeri (ADUN) Tasik Biru, Dato Henry Harry Jinep bisi datai ngerichah pengerami nya lalu temegah meda pemanah timbal mensia mayuh enggau pengusung luar.

“Aku ngarapka semangat tu ulih ditan ngambi kitai ulih terus seati ngemansang Pelilih Bau,” ku iya maya dirandau pengudah konsert nya.
Iya mega mai mensia mayuh sama ngerichah malam pengerami kena Hari Minggu tu ti deka ngatur Pekit Kepenudi Miss Tasik Biru 2025.

Pengerami Tasik Biru 2025 disadang terus nyadi nalan ngempung komuniti sereta pematak temuai menua enggau antarabansa ngagai Pelilih Bau.

Sama datai, Pegawai Pelilih Bau, Eddy Nayoi; Sekretari Kaunsil Pelilih Bau, Ong Chin Ping; enggau Tuai Polis Pelilih Bau, DSP Dr Daram Ruer. -EDISI UKAS