TANJUNG MANIS: Peranak ditu berasai gaga pengudah Padang Bilun Tanjung Manis deka diseleti mungkur pengawa ngaga terminal baru, arung deka ditangkir, menara pematau trafik langit sereta nyendiaka fasiliti imigresyen, kastam enggau pengelikun.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa nyeleti padang bilun tu digaga nentuka bilun bansa ATR72 ulih sangkai enggau bekejang berindik ari sebedau tu padang bilun nya semina nerima bilun ‘twin otter’.

“Nya kebuah, aku dalam Perintah Sarawak udah berandau lalu kami deka meranakka puku nangkir padang bilun tu nengah agih belanja dipelaba penyampau RM327 juta.

“Belanja tu enda nyengkaum kitai ngaga padang golf berindik ari naka diatu, dikena ngulihka pemansang agi bedau tentu lalu nya kebuah, Perintah Sarawak ‘tama’ dulu ngambi ngaga nya lalu udah nya nyiri orang ngadu ke nya seraya hotel ti digaga kitai deka nengah chara bekerejasama.

“Tu deka meri mayuh pemaik ngagai peranak lokal kelimpah ulih ngasaika fasiliti ti disediaka,” ku iya.

Iya madah munyi nya maya bejaku ba Pengawa Bejadika Projek Nyeleti Padang Bilun Tanjung Manis ti diatur di Dewan Industri Kecil Sederhana, ditu kena Hari Enam.

Datuk Patinggi Abang Zohari madah, padang bilun tu ulih ditangkir besai agi dudi hari enti sema bilun majak nambah seraya nentuka tu ulih nerima bilun ‘airbus’.

Kebuah pia laban, ku iya, bemacham pemansang infrastruktur enggau pematak benung dilanggur di Tanjung Manis nyengkaum resort pemesai 568 ikar semak Pantai Belawai.

“Kitai nyimpan sekeda ba belakang nya dulu laban enti sema kelalu mayuh orang datai ke Tanjung Manis, kitai deka nangkir agi ngambi padang bilun tu ulih nerima bilun ‘airbus’,” ku iya baru.

Nitih ke penerang, ungkus projek nyeleti tu dipelaba entara RM300 juta nyentuk RM800 juta, nitih ke pemutus tungkap ti benung dipejalai ngena agih belanja RM5 juta ngagai Kaunsil Pemansang Kayu Ramu Sarawak (PUSAKA).

Maya dirandau pemberita pengudah ngabas Terminal Pengedaran Innocement Sdn Bhd di Kaunsil Penyangkai Kapal Tanjung Manis, Datuk Patinggi Abang Zohari madah ke kompeni nya deka numbuhka siti da kilang nginjin simen ditu berindik ari peminta ari menua Vietnam ti manggai 8500 tan simen.

Terang iya, pekara tu ngerandang mayuh agi peluang gawa enggau ngerembaika agi industri di Tanjung Manis.

Sama datai, Sapit Premier Sarawak, Datuk Amar Awang Tengah Ali Hasan, Menteri Utiliti enggau Telekomunikasyen Sarawak, Dato Sri Julaihi Narawi, Menteri Pengangkut Sarawak, Dato Sri Lee Kim Shin, Sekretari Perintah Sarawak, Datuk Amar Mohamad Abu Bakar Marzuki, Sapit Menteri di Opis Premier Sarawak (Pekara Korporat, Pemadah enggau UKAS), Datuk Abdullah Saidol, Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh, Sapit Menteri Pengangkut Sarawak (Langit enggau Darat), Datuk Dr Jerip Susil, Sapit Menteri Infrastruktur enggau Pemansang Penyangkai Kapal Sarawak, Datuk Ir Aidel Lariwoo, Sapit Sekretari Perintah Sarawak (Perambu Ekonomi enggau Pemansang), Dato Sri Dr Muhammad Abdullah Zaidel, tuai opis enggau temuai dipebasa bukai. – EDISI UKAS