KUCHING: Opis Menteri Pelajar Malaysia (KPM) netapka bisi lima inisiatif baru serimbai ngintu Hari Pengajar 2025 dikena ngenegap pengawa nyadi pengajar sereta nyungkak pengelantang raban pengajar.
Menteri Pelajar Malaysia, Fadhlina Sidek madah, inisiatif keterubah ti deka meri pengelantang ngagai beribu iku pengajar di selampur menu, iya nya ngemendarka peminta nukar endur ngajar enti udah gawa dalam kandang dua taun tauka 24 bulan.
“Kitai mega deka nyiri 1,470 iku Personel MyPg, iya nya pemantu pengajar ungkup taun 2025 ke alai tiap buah sekula ke dipilih nitihka pematut deka nerima dua iku pemantu pengajar nyaup pengawa ninting hari, ngambi ke pengajar ulih ngemerat proses ngajar sereta belajar," ku iya.
Fadhlina madah munyi nya lebuh bejaku ba Program Ngintu Hari Pengajar Renggat Nasional 2025 di Palan Konvensyen Borneo Kuching (BCCK) ditu, Hari Lima.
Berebak enggau nya, Fadhlina mega madah, bisi 32 iku pengajar nyulut nyengkaum penerima Anugerah IKON, Anugerah Pengajar Inovatif, Anugerah Khas Pelajar enggau Anugerah Guru Berwibawadeka diberi peluang nampung belajar ba United Kingdom enda bebayar nengah program Global Immersion For Future-Ready Teachers (GIFT).
Kelimpah ari nya, KPM mega meri awak ngagai pengajar enggau pegawai ke dipilih ngambi bagi ba program kus timpuh pandak ba menua luar ba bidang strategik dikena ngenegap pengelandik profesional raban pengajar menua.
Inisiatif kelima iya nya diskaun 20 peratus diberi ungkup pengajar selampur menua tu meli tiket bilun ba portal MH GoM.
Lima iti inisiatif nya nerima timbal manah ari raban pengajar lalu dipeda singkang progresif KPM nempa ekosistem pelajar ke lebih meruan, responsif sereta bepelasarka dudi hari.
Program maya nya dipenyadi Sapit Menteri Besai Malaysia, Datuk Patinggi Dr Ahmad Zahid Hamidi ke mega bela bejadika pengawa nyua Anugerah Tokoh Kepimpinan Pendidikan Kebangsaan 2025 ngagai Datuk Dr. Mistirine Radin enggau Anugerah Tokoh Guru Peringkat Kebangsaan 2025 ngagai Sukimin Juki.
Sama datai, Menteri Kereja Raya Malaysia, Dato Sri Alexander Nanta Linggi, Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn, Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah, Tuai Direktor Pelajar Malaysia, Datuk Azman Adnan sereta temuai dipebasa ke bukai.-EDISI UKAS
