KUCHING: Perintah Sarawak ngungkupka agih belanja manggai RM3.5 bilion ungkup timpuh lima taun ke udah dikena ngemansangka industri digital di menua tu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, belanja nya diberi nengah agensi baka Sarawak Multimedia Authority (SMA), Palan Penyulut Teknikal Sarawak (CENTEXS) enggau Opis Ekonomi Digital Sarawak (SDEC).

Ku iya, pengawa ngaduka infrastruktur bela diatur seretai enggau belanja nyauka RM600 juta setaun.

"Dalam kandang lima taun, reti iya urung RM600 juta setaun udah dikena ngena belanja kitai empu.

"Tang kitai nemu, kitai meranakka puku ungkup timpuh panjai lalu asil iya kita deka ngasaika penguntung," ku iya.

Iya bejaku munyi nya maya Jelajah Kreatif Digital ke diatur Opis Menteri Digital Malaysia di TEGAS Digital Village ditu, Hari Lima.

Nambah ke jaku iya, Premier Sarawak madah, ekonomi digital begunaka pengeransing semua sektor.

Ketegal nya ku iya, macham bengkah program diatur lebih agi ungkup rayat B40 nyengkaum meri Bantu Barang Diguna Sarawak (SKAS) ti ngena aplikesyen digital tauka e-wallet Sarawak Pay.

"Tang kitai meseti nemu, agi bisi penemu ba luar din, ulih ke enda rayat Sarawak ngena Sarawak Pay?

"Nama ke nyadi sehari tu, 85 peratus ba menua pesisir ulih ngena Sarawak Pay," ku iya madah baru.

Sama datai maya nya Menteri Digital Gobind Singh Deo, Sapit Menteri Digital Datuk Wilson Ugak Kumbong, Sapit Menteri Pengatur Mengeri, Tanah enggau Rampa Menua Sarawak Datuk Len Talif Salleh sereta bala pemesai ke bukai. -EDISI UKAS