BINTULU: Bisi 345 penerima ari sitak Kunsil Nengeri (DUN) Kakus, Murum, Jepak enggau Kemena udah nerima surat pala tanah Seksyen 18 Kanun Tanah Negeri (KTN) Sarawak ba siti program ke diatur ditu, Hari Empat tu tadi.

Program nya udah dipenyadi Sapit Premier Sarawak ke mega Menteri Pengeraja Asal enggau Pemansang Mengeri, Datuk Amar Awang Tengah Ali Hasan.

Ba jaku iya, Datuk Amar Awang Tengah madah, pengeransing perintah nengeri nyaga hak beempu Tanah Adat Bumiputera (NCR) endang nitih ke undang-undang sereta disukung enggau penerang ti tegap.

Ku iya, taja pengawa nyukat tanah NCR udah berengkah kenyau taun 1960-an semina 260,000 hektar tanah mujur disukat lalu diberi surat pala tanah manggai taun 2010.

Dikena ngerumban pengawa nya, perintah nengeri ku iya, udah ngatur chara renggat berengkah taun 2010, iya nya nyukat kelinggi lalu ditangkan enggau nyukat individu, nitih ke peminta sereta penerang ti tegap.

“Naka ke diatu, lebih 1.2 juta hektar tanah udah mujur disukat ngena chara sukat kelinggi di selampur Sarawak.
“Tu ngelai perintah bebendar mantu rayat beempu ke tanah sida,” ku iya.

Nyentuk diatu, lebih 9,000 lot individu udah disukat ba lebih 118,000 hektar tanah lalu 32,450 hak beempu udah mujur diatur nengah Seksyen 18 KTN.

Ba pekara bekaul, iya madah, semua penerima surat pala tanah nya enda ibuh mayar chukai tanah, premium tauka mayar pengawa nyukat laban ungkus udah dipelanja perintah nengeri.

Iya mega ngelalau rayat ngambi ke semampai meri kerejasama ba pengawa nyukat tanah ketegal ngira rebak baru dudi hari.

“Tanah, reta ti patut dijaga lalu dipeturun nengah chara betul. Perintah deka majak bejalaika pengawa nyukat tanah nitihka pematut,” ku iya madah baru.

Sama datai maya nya, Residen Sitak Bintulu, Datu Nyurak Keti, ADUN Murum, Kennedy Chukpai Ugon, ADUN Jepak, Iskandar Turkee, Menijar Besai Komiti Pemansang Bintulu, Datu Muhamad Yakup Kari, Direktor Pengatur Nengeri Sarawak, Jasni Jubli enggau Direktor Tanah enggau Survei Sarawak, Awang Zamhari Awang Mahmood.-EDISI UKAS