SIBU: Karnival Lumba Media Sarawak (KASUMeS) 2025 ti diatur Unit Komunikasi Awam Sarawak (UKAS) siti singkang proaktif nerenak gaya idup bepengerai sereta nyaup nyungkak pengelantang raban media di menua tu.

Kaban Kunsil Nengeri (ADUN) Bukit Assek, Joseph Chieng Jin Ek madah, inisiatif baka tu ukai semina meri awak ngagai pengemeran media belelak ari pengawa ninting hari sida tang bela meransang ngemeran gaya idup bepengerai.

“Raban pemberita seruran napi pengawa enda ngira maya sereta hari.

"Karnival tu endur pemadu manah dikena sida muai pengelelak seraya ngemeran gaya idup bepengerai,” ku iya.

Iya madah munyi nya maya bejaku bejadika Pekit Pickleball KASUMes 2025 ti diatur di IPSS Pickleboll Courts ditu, kena Hari Empat tu tadi.

Maya nya Joseph Chieng bela madah, penguji ti ditapi bala pemberita ke semampai kiruh lebih agi ba ujung minggu tauka maya kemisi.

Ku iya, tanggungpengawa siku pemberita enggau pengari rayat nyau deka sebaka, lebih agi baka jam gawa, pengeransing ngagai rayat sereta penanggul ngatur pengidup enggau pengawa.

"Berindik ari nya, nengah KASUMeS, kitai diberi awak begulai enggau pangan diri sereta meransang gaya idup bepengerai,” ku iya nambah baru.

Iya mega ngarap karnival baka tu nyadi program ninting taun lalu dikerembai ngagai selampur Sarawak ungkup pemaik ngagai mayuh agi pengemeran media menua tu.

Program nya ditembu enggau pengawa nyua perais ngagai bala ke udah menang nitih ke kategori pekit, ditangkan enggau main pickleball entara Joseph Chieng enggau Direktor UKAS, Awang Putrayusrie Awang Redzuan.

KASUMeS 2025 ungkup Zon Tengah bisi dua bengkah main, iya nya futsal enggau pickleball, digulu penyereta ari enam tim futsal lelaki, dua tim futsal indu, sereta 32 iku pemain pickleball.

Program nyerumba Hari Pemberita Nasional (HAWANA) Renggat Sarawak tu deka ditandu di Zon Utara ke disadang diatur di Miri kena 24 Mei tu sebedau tembu di Zon Selatan di Kuching kena 9 enggau 10 Jun ke deka datai.-EDISI UKAS