KUCHING: Sarawak diatu nguing ngagai hab besai industri aeroangkasa serantau deka nempa industri nya nyadi pelasar baru ekonomi nengeri tu.
Nengah Sempekat Pemereti Ati (MoU) entara i-CATS University College enggau National Aerospace Industry Corporation (NAICO) Malaysia ke deka disain maya Program Pemandang Maritim enggau Aeroangkasa Antarabansa Langkawi (LIMA’25) kena 20 Mei tu, Sarawak disadang nibak siti agi singkang baru nengah pengawa ngambi bagi ba aeroangkasa menua enggau rantau tu.
Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, inisiatif tu deka nengkebang beribu pengawa puang begaji besai ba bidang injiniring, ngaga, nyeruri sereta pemansang teknologi aeroangkasa pemadu baru.
Nitih ku iya, enggau tikas industri aerongkasa disadang ngelui USD1.4 trilion manggai taun 2030, perintah nengeri ransing nyadi sebagi ari ekosistem strategik tu.
“Nengah teknologi baka dron ba sektor betanam betupi, sistem komunikasyen satelit sereta pemansang enggau eksport chip semikonduktor aplikasyen aeroangkasa, Sarawak deka nempa diri nyadi penengkebang ngagai pemansang industri tu,” ku iya ba aum media di ditu, Hari Empat.
Nambah ke jaku iya, Dato Sri Roland madah, pemansang nya ukai semina nyungkak pemansang ekonomi tang mega nempa pengulih menua ngati kediri ba bidang teknologi tinggi, seriris enggau pengingin nempa digital enggau inovasyen bepelasarka pengelandik menua tu.
Ku iya, Sarawak ngelanggur bemacham inisiatif bukai baka ngaga kampus aeroangkasa di Lundu, penumbuh fakulti aeroangkasa di i-CATS enggau meri peluang nembiak nampung pelajar teknikal ngagai renggat tinggi dikena ngadaka pengereja pengawa bepengelandik ke ulih nyaup nipak guna peminta industri dudi hari.
“Tu ukai disebut pia aja. Tang kitai benung mansang nempa Sarawak nyulut ba landskap aeroangkasa Asia,” ku iya madah baru.
Kelimpah ari nya iya madah, kerejasama strategik begulai enggau NAICO, agensi perintah besai sereta raban antarabansa bela dipejalai ngambika Sarawak ulih nyadi palan ngelanchar satelit orbit baruh (LEO), lalu nyaup nipak peminta global ngelanchar satelit mit ari palan khatulistiwa ti strategik. - EDISI UKAS
