SIBU: Karnival Lumba Media Sarawak (KASUMeS) 2025 renggat zon tengah ke diatur Unit Komunikasi Awam Sarawak (UKAS) udah berengkah ditu, Hari Empat.

Dua bengkah main iya nya futsal diatur di Stadium Bukit Lima enggau Pickleball di IPSS Pickleball Courts, nyadi pemungkal karnival nya ke digulu raban media zon tengah.

Direktor UKAS, Awang Putrayusrie Awang Redzuan madah, karnival tu ukai semina program ngelantang ati tang nyadi siti pelasar ti besai reti nempa penyerakup raban media.

“Tu siti chara baru UKAS ngerapit sereta ngenegap kaul professional ba raban media enggau agensi ke bisi ba semua sitak menua di Sarawak," ku iya.

Iya bejaku munyi nya maya bejaku sebedau bejadika pengawa ngelai 'kick off' KASUMeS 2025 berengkah diatur serimbai enggau pengawa nyambut Hari Pemberita Nasional (HAWANA) Renggat Sarawak 2025.

Nambah ke jaku iya, Awang Putrayusrie madah, ulah baka beserakup, tan ati enggau kerejasama ba siti tim ke dikemeran nengah inisiatif tu endang setipak enggau guna dunya pemberita ke seruran dinamik sereta mayuh penguji.

"Pengerai endang kunchi pemujur semua pengawa, nyadi, pengawa lumba tauka main patut dikemeran ninting hari ngambika pengemeran media semampai regas, gerai sereta semampai besedia ngenataika penerang ngagai rayat enggau mujur agi,” ku iya madah baru.

Berebak enggau nya, Awang Putrayusrie meri tabi puji ngagai media di Sarawak ti ngelama tu nyadi kaban strategik UKAS ba pekara ngenataika penerang ti betul sereta nempa pemereti rayat senentang polisi enggau program perintah.

KASUMeS 2025 ungkup Zon Tengah digulu penyereta ari enam tim futsal lelaki, dua tim futsal indu enggau 36 iku pemain pickleball.

Program KASUMeS 2025 tu deka ditandu di Zon Utara ke disadang diatur di Miri kena 24 Mei tu, sebedau tembu di Kuching ungkup Zon Selatan kena 9 enggau 10 Jun ke deka datai.-EDISI UKAS