KUCHING: Sarawak ngemeratka pengeransing nengkebang digital dudi hari ti inklusif sereta progresif nengah tuai ti jauh runding enggau ulih bejalaika polisi ke meri empas besai.

Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, Sarawak diatu ukai semina nitih arus pemansang digital tang mutus ati nyadi penengkebang transformasyen digital di rantau tu.

“Iringtuai ba dunya jampat mansang maya tu ukai semina bisi visyen, tang begunaka pengawa, nemban sereta berani nempa inovasyen,” ku iya bejaku ba Sarawak Leadership Talk, “Pioneering Progress – Leadership in Shaping Sarawak’s Digital Future” di Auditorium Sarawak Skills ditu, Hari Empat.

Nambah ke jaku iya, Dato Sri Roland Sagah madah, Sarawak udah ngatur bemacham inisiatif strategik nyungkak transformasyen digital nengeri nengah Sarawak Digital Economy Strategy 2018–2022 ti nyerangkung 47 atur pengawa ba semilan batang sektor.

Nerang ke pekara nya, iya madah, sekeda ari inisiatif tu iya nya numbuh Centexs Digital Academy enggau Digital Village dikena ngelatih nembiak enggau nyaup ’startup’, sereta penumbuh Integrated Talent Development Agency (INTA) dikena nipak pelajar enggau guna industri.

"Perintah mega ngatur Digital Inclusivity Programme dikena ngerembaika pengulih teknologi ngagai kandang menua pesisir nengah bilik kelas pintar enggau bungkur internet.

"Tu nyengkaum numbuh Sarawak ID sereta data langkar kereja ke ulih dipeda dikena ngemanah, ngelurus enggau ngemuntang servis perintah,” ku iya madah baru.

Berebak enggau nya, Dato Sri Roland nyemetak madah, teknologi aja enda chukup enti nadai iringtuai ke bisi etika, inklusif enggau bepenemu jauh.

Ba tuju nya, opis menteri iya ransing deka nempa nembiak ti ngembuan timpai runding ke mua, bepengelandik STEM enggau digital, sereta nyikap rebak dudi ke ulih napi penguji ekonomi digital.-EDISI UKAS