DEBAK: Program Sejambak Kasih Sitak Betong 2025 ditandu baru enggau pengawa nyua pemeri ngagai raban beguna ke bantu nyerumba Hari Gawai ke deka datai.

Sapit Menteri Pemansang Pengelantang Komuniti Sarawak ke mega Kaban Kunsil Nengeri (ADUN) Saribas, Datuk Mohammad Razi Sitam, madah Program Sejambak Kasih sebagi ari inisiatif ninting taun perintah ke udah dipejalaika kenyau 20 taun ke udah ti ngembuan tuju mantu raban ke kurang penatai pemisi nyikap diri ngintu hari besai.

“Program tu ukai semina ngelempungka tating belanja penerima tang mega nyadi pelasar ngerapitka kaul bala perintah enggau rayat,” ku iya.

Iya madah munyi nya ba Program Sejambak Kasih ti diatur ba Rumah Panjai Gara Tindin, Belassau, Dit, ditu, apin lama tu tadi.

Maya nya mega, iya madah, bisi 24,101 penerima di selampur Sarawak nerima bantu serimbai Hari Gawai taun tu, nyengkaum 2,376 iku ari Sitak Betong.

Sama datai ngerichah program nya, Kaban Parlimen Betong, Dato Dr. Richard Rapu, pengari Residen Sitak Betong, Javani Rashwan, Pegawai Opis Pengintu Pengelantang Mensia Mayuh Betong, Abdul Shamat Kassim sereta Tuai Raban Bansa enggau Tuai Genturung Pendiau ari Pelilih Mit Debak.-EDISI UKAS