JULAU: Industri lada menua majak ngerembai ba tikas antarabansa alai ngerikod penyampau eksport nambah 24 peratus ba taun 2024 tauka RM186.67 juta ti dibanding enggau RM149.97 juta taun sebedau nya.

Tu bepun ari peminta ke majak nambah ari menua baka Jepun, Korea, China enggau Eropah lalu nya ngayanka lada Malaysia diatu laku ba makit global.

Sapit Menteri Peladang enggau Komoditi, Datuk Chan Foong Hin madah, kebuah pekara tu nyadi ketegal pemanah kualiti lada Malaysia.

“Pengulih lada Malaysia besemekih ba renggat global ukai semina bepanggai ba kuantiti tang mega ba kualiti,” ku iya maya bejaku ba Program Nemuai Gawa Industri Agrikomoditi Lada di Rumah Thomas, Nanga Sekedang, Entabai ditu, apin lama tu tadi.

Berebak enggau nya, iya ngelalau Komiti Lada Malaysia (MPB) majak ngenegap kerejasama strategik begulai enggau pemekuh industri dikena nyamin pengulih sektor lada menua besemekih.

Sekeda ari inisiatif MPB nyengkaum ngatur program dikena mantu orang bekebun ngemesaika kebun sida kelimpah meri latih teknikal enggau sukung.

Ba program nya, Chan mega bisi nyuaka Projek Jalai Kebun Mit (JLPK), 1.5 kilometer pemanjai beungkus RM209,540 ke udah tembu digaga di Rumah Sang, sereta nyuaka bantu Skim Nanam Lada Tuai beungkus RM280,000.

Naka ke diatu, bisi 6,980 orang bekebun lada ba 2,138 hektar pemesai tanah di Julau udah ngerejista nengah Sistem E-Pekebun MPB ti mandangka timbal manah ba sektor lada.-EDISI UKAS