SARIKEI: Pengawa ngaga Opis Perintah Sarawak Sitak Sarikei (IAC Sarikei) ke baru kelai pengeransing Perintah Sarawak nyungkakka servis perintah ungkup pengelantang rayat.
Pekara nya dipadah Sekretari Perintah Sarawak Datuk Amar Mohamad Abu Bakar Marzuki maya pengerami bejadi opis nya, Hari Tiga.
"Pengerami sehari tu nyadi siti agi kelai pengeransing Perintah Sarawak nyungkakka tikas pemansang pegai Perintah Sarawak.
"Tu seriris enggau juluk ati Perintah Sarawak ngemujurka pemansang holistik ti bepelasarka chara ngatur ke manah, sikar sereta mujur ngenatai servis perintah ngagai rayat," ku iya.
Pengerami maya nya dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti bela disempulang Sapit Premier Sarawak, Datuk Amar Douglas Uggah Embas enggau Datuk Amar Awang Tengah Ali Hasan.
Opis 12 ringkat nya digaga ngena belanja RM147.25 juta alai 500 iku orang kereja perintah ari 10 iti opis enggau agensi perintah nengeri tu.
Datuk Amar Mohamad Abu Bakar Marzuki mega madah, pengawa ngempung opis perintah gawa ba siti opis baka nya deka ngemujurka agi servis kereja perintah ngagai rayat senutuk enggau konsep ‘One Stop Customer Centric Service Delivery’.
Kelimpah digaga ngena konsep moden, IAC Sarikei mega digaga bepelasarkan Indeks Begunan Gadung (GBI) seriris enggau pengeransing Sarawak ngemeranka pemeruan enggau pemansang gadung ba Pelin Pemansang Udah COVID-19 2030 (PCDS 2030).
Ba pekara bukai, iya mega madah, bisi 46 iti projek opis baru dikemendarka digaga ba selampur Sarawak nengah Pelin Pemansang Malaysia Lumpar Ke-12 ti ngena belanja urung RM1.2 bilion nyengkaum lima Opis Perintah (IAC) ba sitak menua.
"Ari 46 iti projek nya, lima iti projek ngaga IAC ba sitak menua alai naka ke diatu 16 iti projek udah tembu nyengkaum IAC Sarikei enggau IAC Serian.
"Kelimpah ari nya, tujuh iti projek benung ba macham renggat digaga nyengkaum IAC Bintulu, IAC Limbang enggau IAC Lawas lalu 23 iti projek opis perintah ba pelilih enggau pelilih mit benung dilanggur," ku iya nerang.
Bela datai maya nya bala Menteri Kabinet Sarawak, Sapit Menteri Pengeraja Asal enggau Pemeruan Rampa Dato Sri Huang Tiong Sii; bala Sapit Menteri Kabinet Sarawak enggau Sekretari Pekara Wang Sarawak, Dato Sri Dr Wan Lizozman Wan Omar.
Kelimpah ari nya, pengerami mega bisi digulu Sapit Sekretari Perintah Sarawak (Pengatur Ekonomi enggau Pemansang), Dato Sri Dr Muhammad Abdullah Zaidel; Sapit Sekretari Perintah Sarawak (Adminstrasyen), Datu Buckland Bangik; Sapit Sekretari Perintah Sarawak (Operasyen), Datu Hii Chang Kee; Residen Sitak Sarikei, Datu Michael Ronnie Langgong; bala Tuai Opis Perintah enggau bala temuai dipebasa ke bukai. -EDISI UKAS
