SARIKEI: Bisi 200 iti projek pemansang udah enggau benung digaga di Sarikei naka 30 April 2025 ti mai pengelantang ngagai empat pelilih menua iya nya Sarikei, Meradong, Pakan enggau Julau.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, projek pemansang tu nyengkaum ai beresi, karan, jematan, jalai enggau ke bukai.

"Semua tu ngena belanja manggai RM4.9 bilion.

"Ditu aku meda projek digaga enggau mujur lalu tu endang deka ngelantangka agi pengawa ngaga semua projek ke dilanggur kitai ba Sitak Sarikei," ku iya madah.

Iya nerangka pekara nya ba aum media Aum Komiti Pengatur Pemansang Nengeri (SDCCM) Sitak Sarikei ditu, Hari Tiga.

Premier Sarawak mega madah, pemansang nya deka mai ubah besai lebih agi ba orang betanam betupi.

"Ba empat iti pelilih tu iya nya Sarikei, Meradong, Pakan enggau Julai, aku meda pemansang baka jalai, karan enggau ai deka nyungkakka agi tikas sektor betanam betupi nyerumba kitai mega deka ngaga Agropark di menua tu," pia ku iya.

Dulu ari nya ba jaku iya, iya madah ke diri deka ngaduka jalai ngelawa Agropark ke agi ngena tikas 'jalai kebun' ngambika orang betanam betupi lantang agi ngereja pengawa sida.

Bekaul Opis Perintah Sarawak Sitak Sarikei ke baru, ku iya, ungkus dikena ngaga begunan nya manggai RM147.25 juta ke digaga ngena Indeks Begunan Gadung (GBI) kelimpah bela disikap enggau internet.

Opis nya dipadahka ulih endur 500 iku orang kereja perintah ari 10 agensi enggau opis Perintah Sarawak nyengkaum Opis Residen Sitak Sarikei, Opis Pelilih Sitak Sarikei, Opis Tanah enggau Survei (JTS), Opis Kereja Raya (JKR), Opis Bekal Ai Menua Pesisir (JBALB), Unit Komunikasi Awam Sarawak (UKAS), Palan Servis Sarawak, Opis Ngatur Belanja Sarawak, Opis Kampung Sarawak enggau Opis Pengintu Pengelantang Mensia Mayuh.

Bela datai maya nya Sapit Premier Sarawak, Datuk Amar Douglas Uggah Embas enggau Datuk Amar Awang Tengah Ali Hasan; Menteri-Menteri Kabinet Sarawak; Sapit Menteri Pengeraja Asal enggau Pemeruan Rampa Menua, Dato Sri Huang Tiong Sii; Sapit Menteri Sarawak enggau Sekretari Pekara Wang Sarawak, Dato Sri Dr Wan Lizozman Wan Omar.

Kelimpah ari nya, pengerami mega bisi digulu Sapit Sekretari Perintah Sarawak (Pengatur Ekonomi enggau Pemansang), Dato Sri Dr Muhammad Abdullah Zaidel; Sapit Sekretari Perintah Sarawak (Adminstrasyen), Datu Buckland Bangik; Sapit Sekretari Perintah Sarawak (Operasyen), Datu Hii Chang Kee; Residen Sitak Sarikei, Datu Michael Ronnie Langgong; bala Tuai Opis Perintah enggau bala temuai dipebasa ke bukai. -EDISI UKAS