SIBU: Projek ngaga Loji Meresi Ai Akut di Sungai Sadit ditu ti beungkus RM5 juta diatu udah tembu.

Menteri Utiliti enggau Telekomunikasyen Sarawak, Dato Sri Julaihi Narawi madah, pengawa ngaga loji nya berengkah ari September 2024 enggau kapasiti ngeluarka 4 juta liter air sehari lalu ulih nyaup dua loji besai iya nya Loji Meresi Ai Salim enggau Loji Bukit Lima.

“Diatu Loji Meresi Ai Akut tu udah berengkah dikena lalu nyaup Loji Salim enggau Loji Bukit Lima.

“Enggau tu, dua iti loji nya lebih agi mekal agi ngagai mengeri Sibu aja lalu sida ke diau di Sungai Sadit enggau menua besemak bela deka nerima bekal ai enggau meruan agi," ku iya madah ngagai media pengudah bejadika loji nya, kena Hari Dua tu tadi.

Dato Sri Julaihi nyemetak madah, pengawa bekaul patut disungkakka agi dikena nentuka menua Sibu nerima bekal ai ke chukup taja diatu sitak nya udah bisi ai 87.2 peratus.

“Perintah mega benung nyeleti Loji Meresi Ai Salim dikena ngasilka kapasiti 300 juta liter sehari sereta ngaga pansik dikena nambah kapasiti Loji Bukit Lima, ketegal ngira guna dudi hari,” ku iya nerang baru.

Kelimpah ari nya iya mega madah pemesai reti ngudrangka penyampau 'non-revenue water' ti nyadi bepun ari paip ai pantis laban udah lama, tanah berinsur kelimpah jai maya bisi pengawa bukai digaga.

“Aku ngelalau semua kontraktor enggau bala ke bekaul semampai ngemeratka pekara tu lalu ripot enggau lengkas ngagai opis bekaul nyema penusah nya ditemu nyadi," ku iya madah.

Ba pekara bekaul, Opis Bekal Ai Menua Pesisir (JBALB) Sarawak ba siti penerang madah, projek ngaga loji nya dilanggur dikena ngemanah sistem bekal ai ke diatu sereta nipak peminta bekal ai ke majak nambah ba kandang Sungai Sadit sereta menua semak dia dipegai sitak Kunsil Nengeri (DUN) Bawang Assan.

Projek ke dipelanja perintah Sarawak nya bela nyerangkung pengawa nganti paip baru.

Sama datai Kaban Kunsil Nengeri (ADUN) Bawang Assan, Dato Sri Wong Soon Koh; ADUN Bukit Assek, Joseph Chieng Jin Ek; Residen Sitak Sibu, Abang Mohamad Porkan Abang Budiman enggau Direktor Opis Bekal Ai Menua Pesisir, Ir. Ts. Awang Mohammad Fadillah Awang Redzuan. - EDISI UKAS