MATU: Perintah Sarawak udah ngemendar agih belanja sepenyampau RM58.5 juta dikena ngaga projek jalai ari Kampung Sawai ngelawa jalai besai ke Sibu.

Kaban Kunsil Nengeri (ADUN) Daro, Safiee Ahmad madah, projek tu disadang deka ngemuntang peranak menua nya mindah sereta ngerandang mayuh awak nyungkak ekonomi.

“Projek jalai alun tu deka ngemuntang peranak Kampung Sawai ngelawa mengeri Sibu tauka ngagai menua bukai.

“Kelimpah ari nya kitai andal projek tu deka nyungkak pemansang ekonomi rayat ditu,” ku iya maya bejaku ba Program Lan Berambeh SK Sawai & Pekit Lumba Sekula SK Sawai ditu, Hari Dua tu tadi.

Nitih ku iya, jalai nya deka meri pengelebih ngagai peranak menua nya nganjung anak sida belajar ba mengeri baka ba Universiti Teknologi Sarawak (UTC) di Sibu.

Ba pengerami nya, iya mega nerangka inisiatif pelajar enda bebayar ari perintah Sarawak ti deka berengkah ba taun 2026 seriris enggau pengeransing perintah nengeri deka nentuka nembiak ulih nampung pelajar enda ngira penatai tauka endur sida.

Safiee enggau nya ngelalau bala apai indai ngambi nyadi ke pelajar sebagi ari pekara ke patut dikemerat ba ruang bilik laban pekara nya besai reti dikena ngubah landskap ekonomi ruang bilik.

Kelimpah ari nya, iya bela dipebasa bejadika Projek Nyeleti Pendai SK Kampung Sawai ti beungkus RM100,000 lalu nyua Projek Tembu Nyeruri Surau Kampung Sawai ke beungkus RM100,000.

Sama datai ba program nya, Kepala Pengajar SK Kampung Sawai, Yahya Lamuji; Yang Dipertua PIBG SK Kampung Sawai, Azreen Jul; Sapit Pegawai Pelajar Pelilih (PPD) Daro, Junaidi Mohamed sereta Pegawai Kaul Sekula, Norafizan Noor Azaam. - EDISI UKAS