KUCHING: Bisi 66 peratus orang dagang mit enggau jelan pemesai (PKS) di Sarawak udah berengkah ngemeran prinsip Rampa Menua, Rama enggau Atur (ESG) ba pengawa dagang sida.

Nitih ke penerang media Alliance Bank Malaysia Berhad sehari tu, ripot 'Navigating ESG in Sarawak: Insights From SMEs' udah dilanchar Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg serimbai Forum Ekonomi Hidrogen (H2EF) ditu, Hari Dua.

Datuk Patinggi Abang Zohari ba pemuka jaku ripot nya madah ESG siti komponen besai ba pelin pemansang meruan nengeri tu, seriris enggau Pelin Pemansang Udah COVID-19 2030 (PCDS 2030).

Kelimpah ari nya, Tuai Pegawai Eksekutif Alliance Bank Group, Kellee Kam madah, ripot tu tampak mandang pemar ke ditapi PKS, nyengkaum bekaul penatai, penyaru senentang bemacham langkar pengawa ESG sereta isu senentang akses bebayar.

Alliance Bank ngarap ripot tu ulih nyadi lalau ti beguna ngagai PKS ba tuju ngenegap pengulih besemekih, nempa kapasiti sereta matak meranak puku nengah ulah dagang ti meruan.-EDISI UKAS