KUCHING: Perintah Sarawak nengkebang siti bidang pelajar baru ba universiti di nengeri tu iya nya Ijazah Sarjana Muda Kejuruteraan Pengurusan Pembinaan.

Pekara tu dipadahka Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg maya bejadika International Construction Week (ICW) Borneo 2025 di Pusat Konvensyen Borneo Kuching (BCCK) ditu, Hari Dua.

Nitih ku iya, tu sekeda ari pelajar keterubah baka nya disediaka di Borneo.

"Kus tu ulih diambi semua rayat Sarawak ke nampung pelajar ba universiti laban pelajar tu deka dipelanja Perintah Sarawak,” ku iya.

Kelimpah ari nya, Datuk Patinggi Abang Zohari maya dirandau media nangkan nya madah, pemutus nya digaga laban nitihka pematut bisi industri mimit karbon ketegal pengawa ngaga (begunan) siti ari industri ti mansutka karbon.

Ku iya, chara baru meseti bisi digaga, nyengkaum ba pekara kereban ke dikena ukai semina kereban gadung aja tang mega chara bekaul ba industri begunan.

"Nya alai, taun baru ila kitai deka nganjung anak kitai ke ulih nampung belajar ba universiti enggi Sarawak ngambi pelajar ke patut,” ku iya nerang.

Sekeda ari universiti ke dipilih iya nya Universiti Teknologi Sarawak (UTS) enggau Universiti Swinburne bela madah ke diri udah besedia nyendiaka pelajar nya.

Sama datai, Sapit Premier Sarawak, Datuk Amar Awang Tengah Ali Hasan; Menteri Pengangkut Sarawak, Dato Sri Lee Kim Shin; Menteri ba Opis Premier Sarawak, Dato Sri John Sikie Tayai, Menteri Kereja Raya, Dato Sri Alexander Nanta Linggi; bala Sapit Menteri Perintah Sarawak enggau Perintah Besai, Tuai Opis Perintah sereta pemesai ke bukai. -EDISI UKAS