KUCHING: Siti dokumen bekaul sempekat Perintah Besai enggau Perintah Sarawak bekaul isu minyak enggau gas deka dipadah enda lama agi.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, dokumen nya deka nerang asil randau strategik begulai enggau Menteri Besai, Dato’ Seri Anwar Ibrahim kena 9 Mei tu tadi.

Nitih ku iya, dokumen nya deka nyerangkung tiga pekara besai ke bela udah disetuju.

“Keterubah, Perintah Besai ngaku undang-undang Perintah Besai enggau Nengeri.

“Kedua, Petroleum Sarawak Berhad (PETROS) deka diaku nyadi agregator tunggal gas ba Sarawak.

“Ketiga, dokumen nya deka sama nyerangkung sempekat komersial ke ngaul penyampau saham Sarawak ba industri gas (LNG) nambah," ku iya.

Iya madah munyi nya lebuh dirandau media sepengudah bejadika Minggu Pembinaan Antarabangsa Borneo (ICW Borneo) 2025 di Palan Konvensyen Borneo Kuching (BCCK) ditu, Hari Dua.

Sebedau tu, Opis Menteri Besai ba penerang media kena 9 Mei madah ke Perintah Besai enggau Perintah Sarawak udah mutus mutarka pekara bekaul PETRONAS enggau PETROS nengah randau.

Randau nya bela digulu pemesai PETRONAS enggau PETROS di Perdana Putra, Putrajaya.

PETRONAS enggau PETROS udah setuju ngaga pemutus prinsip sebedau tu ti ngemuntangka randau bekaul pekara nya.-EDISI UKAS