SONG: Pengawa ngatur Mantar Gawai Dayak Renggat Pelilih Song 2025 ukai semina richah diintu tang mega nyadi pelasar besai nyagu pesaka asal budaya sereta identiti komuniti pupu bansa di Sarawak.

Menteri Kereja Raya Malaysia, Dato Sri Alexander Nanta Linggi madah, iya chukup gaga meda timbal ti chukup manah taun tu nengah bemacham program main asal baka pengawa bejalai bebala mayuh Niti Daun, pengawa mandangka seni asal sereta bazar bejual pemakai enggau krafjari lokal.

“Program baka tu peluang berega kitai ngayanka pekayan asal, ngidupka baru main adat baka ngajat, bepantun, kuntau enggau bemacham main ti majak enda dikeingat,” ku iya bejaku ba Pengerami Makai Lemai Mantar Gawai Dayak di Balai Raya Song, kena Hari Enam.

Ku iya, kelimpah mekuh semangat begulai, pengerami baka tu ulih nambah penatai pemisi komuniti nengah pengawa bejual pemakai enggau produk krafjari di Bazaar Gawai ti diatur sepanjai program nya.

Ngenang pasal pengawa Niti Daun ti diatur, iya muji pupu bansa ti ngemujur pengawa tu baka Iban, Melayu, China, Bidayuh, Orang Ulu enggau India.

Ku iya, tu mih maya ngayanka pekayan asal tiap raban bansa ngagai rebak biak.

Iya mega nyebut pasal sekeda projek pemansang ti benung enggau deka dipejalai seraya ngelalau rayat terus sepenemu lalu anang mudah pechaya enggau isu ti dibantai sekeda raban di media rama.

“Kita anang mudah pechaya ke berita ti sengaja dibantai ketegal deka ngasuh penyerakup rayat pambar. Terus teguh begulai enggau seati,” ku iya nyemetak.

Pengerami nya mega ngatur Pekit Kumang Gawai ke alai dara bajik benama Angelina Rani Gawan dipadu menggi gelar Kumang 2025, mai pulai perais mata duit RM4,000, trofi, jumpang, selampai enggau perais bukai.

Gelar Lulong dipenggi Agnes Sebai Hong Lee seraya gelar Selinggar Matahari dipenggi Jennifer Siba.

Sama datai, Kaban Kunsil Nengeri (ADUN) Katibas, Lidam Assan; Residen Bagi Menua Kapit, Elvis Dedit; Pegawai Opis Pelilih Song, Harry Bruce Edwin sereta temuai bukai. – EDISI UKAS