LIMBANG: Bazaar Gawai Medamit 2025 ukai semina pengerami budaya tang mega nyadi lambang peneguh penyerakup komuniti enggau penyungkak ekonomi lokal tumbuh, ku Sapit Menteri Pengangkut Malaysia ke mega Kaban Parlimen Limbang, Datuk Hasbi Habibollah.
Bejaku ba pengawa nangguh pengerami ti richah diatur di Dewan Terbuka Medamit kena Hari Enam, Datuk Hasbi mega ngemendar agih belanja RM25,000 kelai sukung ngatur Bazaar Gawai Medamit taun tu.
Ku iya, tu siti inisiatif nyengenda nentuka program tu ditampung ti diatu nyadi pelasar penyerakup pupu bansa enggau jalai pengarap ba sitak menua ulu Sarawak.
“Pengawa ngatur bazaar tu ukai semina ngerichah pengerami Gawai Dayak tang mega ulih ngidupka baru ekonomi Pasar Medamit ti suba nyadi pematak nyengkaum ngagai peranak ari menua sepiak, Brunei,” ku iya.
Iya nyemetak madah, pemansang fizikal enggau infrastruktur dikenulu perintah sambil madah ke projek Sabah Sarawak Link Road (SSLR) Renggat Kedua benung chakah dipejalai.
Jalai nya deka nyambung sitak Medamit lalu enda ibuh nengah menua Brunei Darussalam lalu disadang meri pemaik besai ngagai komuniti menua pesisir.
“Penembu projek tu ila deka ngerandang mayuh agi peluang lalu ngangkatka Medamit nyadi pugu ekonomi enggau dagang temuai baru,” ku iya.
Iya madah baru, projek Jalai Ulu Lubai - Bukit Sagan deka berengkah dipejalai bulan June tu pengudah nyerahka taba ngagai kontraktor seraya meri pemaik ngagai peranak dia.
“Pengeransing perintah nengeri diiring GPS enggau Perintah Penyerakup ba renggat Perintah Besai nyata dipeda lalu sitak menua pesisir enda kala dikelaung,” ku iya nyemetak seraya ngelalau rayat terus meri sukung ngagai tuai diatu.
Pengerami nangguh nya richah enggau bemacham pemerindang main asal, Pekit Kumang Anak Mit, chabut tikit benasip enggau simbolik Ngetas Ranyai ti nerima timbal manah ari lebih 550 pengusung ti bisi datai.
Bela datai ngerichah pengerami iya nya Chairman Kaunsil Pelilih Limbang, Kr Sufian Mohat; Sekretari Kaunsil Pelilih Limbang, Michelle Hildalyne Jering Anthony Luta; Penulung Pegawai Pelilih Limbang, Mariati Samat; Sapit Chairman Kaunsil Pelilih Limbang, Kr Adison Langgar Injan sereta tuai komuniti nyengkaum Temenggong Willie Marum enggau Pemancha Robert Kunyu Anggau.
Pengerami diatur Komiti Tamu Medamit enggau kerejasama Kaunsil Pelilih Limbang tu ngayanka pemanah kolaborasyen komuniti ngemujur pengawa tradisyen besai di menua pesisir. – EDISI UKAS
