BINTULU: Ba pengawa nyaga enggau ngelaku pesaka budaya komuniti Dayak, Pekit Ngepan Asal Anak Mit ti diatur serimbai Pasar Gawai Dayak Bintulu 2025, mujur matak perati mensia mayuh kelebih agi rebak biak.

Sapit Menteri Digital, Datuk Wilson Ugak Kumbong ti bejadika pekit nya ngemeratka pemesai guna pelasar digital nentuka pesaka budaya tetap relevan enggau dikelala komuniti global.

“Pesaka asal kitai enda patut semina dipeda nyadi kereban pemandang aja tang meseti idup, dipelajar enggau dikunsi.
“Nengah dokumentasyen enggau pelasar digital, kitai ulih nentuka budaya meruan idup ba jeman moden tu,” terang iya.

Diatur di Balai Suarah Bintulu, pekit tu ukai semina ngangkat pekayan asal Dayak ti chukup manah enggau besai reti tang mega nyadi chunto pemadu manah baka ni budaya ulih ditegap nengah inovasyen enggau kreativiti dalam digital.

Datuk Wilson muji inisiatif nya seraris enggau aspirasyen Malaysia MADANI dikena nyaga identiti budaya menua seraya ngena pemansang teknologi kemaya hari.

Iya nyemetak madah, Opis Menteri Digital keran nyukung inisiatif ngangkatka konten budaya nengah digital baka nyendiaka geran, latih enggau kerejasama enggau raban agensi perintah sereta industri.

Pengawa ngatur Pekit Ngepan Asal Anak Mit mega narit perati Residen Bagi Menua Bintulu, Datu Nyurak Keti; enggau Pegawai Pelilih Bintulu, Awang Mohammed Nizam Awang Ali Bohan ti bela datai meri sukung.

Pekit tu ukai semina meri peluang ngagai mensia mayuh ngayanka budaya sida tang mega meransang ulah temegah ngagai pengeraja budaya.

Nengah kerejasama raban nembiak enggau komuniti, pekit tu dikearap ulih meransang mayuh agi pengawa ngintu pesaka budaya nengah chara ti moden agi. – EDISI UKAS