SEPUPOK: Inisiatif perintah ngemujur Agenda Ekonomi MADANI enggau nyukung aspirasyen Sarawak nyadi nengeri maju terus dipejalai nengah Program Satelit PBM Subis 2025 ti diatur di Dewan Terbuka Sepupok, Niah kena Hari Enam.

Program diatur Opis Pelilih Subis enggau kerejasama Agensi Pemansang Tanah Tinggi (HDA) nya dipenyadi Sapit Menteri Pengerai Malaysia ke mega Kaban Parlimen Sibuti, Dato Lukanisman Awang Sauni.

Ku Dato Lukanisman, program baka tu beguna endar dikena ngemujur pemansang menua pesisir chara berenggat nipak ke kuing tuju Strategi Pemansang Pengudah COVID-19 (PCDS) 2030 Sarawak.

"Kitai deka program baka tu ukai semina seremonial tang amat negu pengidup rayat menua pesisir," ku iya nyemetak
.
Berebak enggau nya, Direktor Kandang Menua HDA, Juan Ubit madah ke atur program tu nyadi siti pelasar ngaul komuniti terus sambil bekunsi penerang sereta inisiatif perintah terus ngagai rayat.

Bemacham aktiviti disedia ungkup komuniti lokal nyengkaum beripai di Kampung Lajong, beperesa pengerai pechuma, pekit nero nembiak mit, belagu enggau chabut tikit benasip.

Entara agensi perintah mega nyendiaka kaunter servis enggau pemandang baka Klinik Pengerai, Amanah Saham Bumiputera (ASB) enggau Opis Pengelantang Komuniti (JKM).

Sama datai ba program iya nya Direktor Opis Pemansang Nengeri Sarawak, Jasni Jubli; enggau Sapit Tuai Polis Pelilih Miri, Superintenden Nur Asyikin Abdullah.-EDISI UKAS